Hlutabréf í Samkaup hafa hækkað um 50%

Hlutabréf í Samkaup hf. seldust á frjálsum markaði á sölugenginu 3 rétt fyrir áramót. Um var að ræða bréf fyrir um tuttugu milljónir króna á söluverði. Fyrsta hlutabréfaútboð í Samkaup hf. var á síðasta ári og var félagsmönnum boðið að kaupa bréf á gengingu 2. Að sögn Skúla Skúlasonar, aðstoðarframkvæmdastjóra Samkaupa er unnið að því að Samkaup fari á hlutabréfamarkað. Rekstur Samkaups gekk vel á síðasta ári og afkoman stóðst allar áætlanir fyrirtækisins. Örar breytingar hafa verið á rekstri Samkaupa með fjölgun verslana. Nú um áramótin var gerður samstarfssamningur við Kaupfélag Hérðasbúa um markaðs -og innkaupamál og bættust þá við verslanir á Austurlandi bæði undir merkjum Samkaupa og Sparkaupa. Fjöldi verslana í eigu eða tengdar Samkaupum hf. eru því orðnar átján talsins.