Hitaveita Suðurnesja hf. fær 10 milljónir dollara frá Bandaríkjastjórn

Hitaveitu Suðurnesja hf. barst í gær formlegt tilboð frá bandaríska flotanum (Department of the Navy) f.h. Bandaríkjastjórnar um greiðslu 10 milljóna Bandaríkjadala til að jafna ágreining aðila vegna uppsagnar hitaveitusamnings sem gerður var árið 1981. Á fundi stjórnar HS hf í dag var samþykkt að taka þessu tilboði og hefur það verið tilkynnt viðsemjendum fyrirtækisins og verður í framhaldinu gengið frá formlegum samningi þar um.
 
Stjórn HS hf samþykkti að taka þessu tilboði þó það væri lægra en fyrirtækið taldi efni standa til þar sem hinn valkosturinn væri löng og kostnaðarsöm málaferli fyrir bandarískum dómstólum með óvissum ávinningi. Þegar fulltrúar bandarískra flotans óskuðu  eftir kröfugerð HS hf í júlí sl. var mjög óvíst um afstöðu Bandaríkjamanna og hver framtíð mannvirkja á svæðinu yrði. HS hf lagði því fram allar sínar ýtrustu kröfur sem byggðu m.a. á:
breytingum sem yrði að ráðast í vegna brotthvarfs þeirra,  kostnað við að fjarlægja lagnir vegna væntanlegs niðurrifs húsa  þess að þá var gert ráð fyrir að einungis 5% húsnæðis yrði í framtíðinni upphitað og  fjárfestingum sem ráðist hafði verið í en myndu nú ekki nýtast.
Mál hafa nú skýrst og ljóst er að sala á heitu vatni  í framtíðinni verður mun meiri en fyrstu áætlanir gerðu ráð fyrir sem hefur áhrif á alla ofangreinda þætti.
Um leið og stjórn Hitaveitu Suðurnesja hf þakkar Bandaríkjastjórn farsæl viðskipti allt frá árinu 1981 er það von stjórnar að uppbygging og endurreisn svæðisins megi hefjast  sem allra fyrst, segir í fréttatilkynningu frá stjórn Hitaveitu Suðurnesja hf.