Heræfingar á Keflavíkurflugvelli í ágúst

Fyrsta heræfing NATO-þjóða undir stjórn Íslendinga verður haldin hér á landi í ágúst. Ríkisútvarpið greinir frá þessu. Verið er að girða af öryggissvæði við suðurenda flugvallarins fyrir varnarstarfsemi. Í ágúst koma hingað til lands flugvélar og hermenn frá ýmsum NATO-löndum.

Heræfingar verða áfram haldnar árlega hér á landi eins og árvisst var á tímum varnarliðsins í Keflavík. Nú verður sú breyting á að æfingarnar verða ekki lengur á ábyrgð Bandaríkjamanna heldur taka Íslendingar við stjórn sem gistiríki.
Íslendingar skipuleggja æfingarnar og leggja fram stoðþjónustu fyrir þátttökuþjóðirnar. Ekki er enn fullmótað hvernig heræfingarnar verða en þær verða þó haldnar árlega, en ekki á 2 ára fresti eins og var á tímum Bandaríkjahers á Miðnesheiði.

Mörgum NATO-þjóðum veðrur boðið á heræfingu í ágúst, þar verða að sjálfsögðu Bandaríkjamenn í lykilhlutverki. Nú er langt komið að girða af öryggissvæði á Keflavíkurflugvelli en þar verður búnaður fyrir NATO lið sem kemur hingað að æfa og til samstarfs á sviði varnarmála. 

Eitthundrað íbúðir sem varnarliðið átti verða teknar í notkun og verður þar gistirými fyrir 200 manns. Hliði öryggisgirðingarinnar verður lokað á næstu dögum til að takmarka þar almenna umferð. Með því er aftur komið lokað svæði í Keflavík eins og Íslendingar eiga að venjast. Þetta svæði er minna við suðurenda flugvallarins, en inni á því svæði er ratsjárstofnun.  Frá þessu er greint á ruv.is