Helguvík í stað Straumsvíkur?

Greiningardeild Kaupþings veltir upp þeim möguleika að verði stækkun álversins í Straumsvík hafnað í atkvæðagreiðslu, muni það flýta fyrir byggingu álvers í Helguvík þar sem orkan muni þá liggja á lausu. Þetta kemur fram í skýrslu Greiningardeildar um mögulega framvindu stóriðjuframkvæmda.

Greiningardeildin gerði ráð fyrir því að af stækkuninni yrði í síðustu hagspá sem gefin var út þann 16. janúar síðastliðinn. Nú er hins vegar ljóst að ekki er öruggur meirihluti meðal íbúa í Hafnarfirði um stækkun álversins í Straumsvík. Það skoðun Greiningardeildar að ef stækkun Alcan verður hafnað í Hafnarfirði muni það flýta fyrir byggingu álvers Century í Helguvík þar sem orkan muni þá liggja á lausu. Það er mat Greiningardeildar að höfnun í Hafnarfirði muni aðeins fela í sér töf á nýjum álversframkvæmdum um 8-12 mánuði. 
 
Ef af öllum þremur álversframkvæmdunum verður sem nú eru á teikniborðinu, þ.e. í Helguvík, Straumsvík og á Norðurlandi,  krefjast þær samtals um 13 TW stunda af nýrri orku og yrði  heildarorkunotkun komin upp í 29 TW stundir sem þýðir um 60% af heildarframleiðslugetu orkuauðlindar þjóðarinnar.  Svo gæti farið að álverið við Helguvík yrði sett á bið meðan orkuöflun færi  fram fyrir stækkun Straumsvíkur. Því telur Greiningardeild að allir álverskostirnir og orkuverin þeim samfara geti orðið að veruleika á tímabilinu 2007-2015.