Heilsufélag Reykjaness skapar 300 störf

Sveitarfélögin Garður, Sandgerði, Reykjanesbær og Vogar auk Þróunarfélags Keflavíkurflugvallar, Bláa Lónsins og Keilis – Miðstöðvar vísinda, fræða og atvinnulífs stofnuðu í gær Heilsufélag Reykjaness um uppbyggingu á heilsutengdum tækifærum á Reykjanesi. Meginmarkmið félagsins er að skapa 300 störf á heilbrigðissviði á Reykjanesi á næstu þremur árum.

Heilsufélag Reykjaness er stofnað á grunni þeirra tækifæra sem Reykjanes býr yfir á sviði heilsu og vellíðunar. Markmið félagsins eru fólgin í markaðssetningu Íslands sem lands hreysti, fegurðar og heilsu. Heilsutengd ferðaþjónusta mun leiða til aukinnar fjölbreytni atvinnulífs á Reykjanesi, skapa ný störf og auknar gjaldeyristekjur.

Heilsufélag Reykjaness mun stefna að því að:

• Skapa 300 störf á heilbrigðissviði á Reykjanesi á næstu þremur árum
• Stuðla að fjölbreyttara atvinnulífi á Reykjanesi
• Stuðla að uppbyggingu heilsuþorps á því svæði sem áður hýsti starfsemi á vegum bandaríska varnarliðsins á Íslandi
• Standa vörð um fjölbreytni og gæði í heilbrigðisþjónustu fyrir íbúa Reykjaness
• Efla rannsóknar- og vísindastarf á Reykjanesi
• Efla menntun og þjálfun á Reykjanesi
• Að koma á samstarfi við virtar erlendar heilbrigðisstofnanir
• Að koma á samstarfi við rannsóknaraðila frá virtum háskólum
• Efla lýðheilsu í gegnum virkar rannsóknir og forvarnaraðgerðir
• Stuðla að innflæði gjaldeyris í íslenskt samfélag
• Stuðla að styrkingu ímyndar  Íslands sem lands hreystis, fegurðar og heilsu
• Stuðla að tækifærum fyrir sérhæfðar heilsulausnir fyrir erlendra viðskipavina á Íslandi
• Stuðla að þjálfun sérfræðinga og annars starfsfólks í veitingu sérhæfðra heilsulausna
• Þróa nýjar námsleiðir í samstarfi við Keili og aðrar menntastofnanir
• Stuðla að þróun og innleiðingu gæðakerfa fyrir heilbrigðisþjónustu

Félaginu er ekki ætlað að vera rekstraraðili heldur mun það leita eftir og stuðla að samningum við einkaaðila og stofnanir um framkvæmd á ákveðnum verkefnum sem miða að því að ná ofangreindum markmiðum.
Í stjórn félagsins voru kjörin: Árni Sigfússon, Grímur Sæmundsen, Oddný Harðardóttir, Sigurður Valur Ásbjarnarson, Hjálmar Árnason, Róbert Ragnarsson og Kjartan Eiríksson.
Í varastjórn voru kjörin: Gunnhildur Erla Vilbergsdóttir, Óli Örn Eiríksson og Magnea Guðmundsdóttir

Ljósmynd: Hilmar Bragi Bárðarson