Harður árekstur í Reykjanesbæ
- Ökumaður fluttur á sjúkrahús.
Harður árekstur varð á gatnamótum Smiðjuvalla og Þjóðbrautar í Reykjanesbæ í fyrradag og var ökumaður annarrar bifreiðarinnar fluttur með sjúkrabifreið á Heilbrigðisstofnun Suðurnesja.
Óhappið varð með þeim hætti að bifreið var ekið af Smiðjuvöllum, þar sem er stöðvunarskylda, og inn á Þjóðbraut í veg fyrir aðra bifreið. Ökumaður og tveir farþegar fyrrnefndu bifreiðarinnar kenndu eymsla eftir áreksturinn og fóru sjálfir á HSS. Bílarnir voru fjarlægðir með kranabíl.
Þá varð árekstur við Nesvelli en engin slys urðu á fólki. Dráttarbifreið var fengin til að fjarlægja ökutækin.
