Handprjóna „samninganet“ í verkfalli

Verkfall framhaldsskólakennara skall á í morgun. Kennarar við Fjölbrautaskóla Suðurnesja opnuðu verkfallsmiðstöð, þá fyrstu á landinu í þessu verkfalli, í Kiwanissalnum við Iðavelli í dag og munu hittast þar daglega á milli kl. 13 og 15 á meðan á verkfalli stendur.

Þegar Víkurfréttir bar að garði ræddu kennarar saman samhliða handavinnu og einn og einn skoðaði stöðu þjóðmála í símanum sínum. Tveir kennarar handprjónuðu trefla sem þeir nefndu í gamni „samninganet“ því bjartsýni einkenndi hópinn og trú á að góðir samningar muni nást á skömmum tíma. Einn kennari var með tarotspil í farteskinu og sagðist hafa rýnt í þau í gær og ekki séð að samningar næðust a.m.k. í dag, en vonaði að spá fyrir morgundaginn verði betri. Annar kennari sagðist ætla að kenna samkennurum sínum að teikna andlitsmyndir ef verkfall drægist á langinn.

Kennararnir voru sammála um mikilvægi verkfallsmiðstöðva og að kennarar hittist og standi saman, hversu lengi sem þetta verkfall gengur yfir. Þrír kennarar úr hópnum höfðu áður farið í verkfall, sem þá stóð yfir í 8 vikur, og þeir voru fullvissir um að staðan verði önnur í þetta sinn.

VF/Olga Björt