Hálka á Suðurnesjum

Töluverð hálka myndaðist á Suðurnesjum síðdegis í dag þegar snjóaði allhressilega á Suðvestuhorninu. Töluvert hefur snjóað víða um land í dag og á sumum heiðum er þungfært. Samkvæmt veðurspá frá Veðurstofu Íslands verður norðlæg átt, víða 8-15 m/s og él, einkum norðan- og austanlands. Minnkandi norðanátt á morgun, en allhvasst á Austfjörðum fram eftir degi. Léttskýjað sunnan- og vestanlands en áfram él norðaustantil á landinu. Kólnandi, víða 5 til 10 stiga frost síðdegis. Suðaustan kaldi og dálítil snjókoma vestantil á landinu annað kvöld.