Hagnaður á rekstri Vatnsleysustrandarhrepps
Vatnsleysustrandarhreppur var rekinn með 37,7 milljóna króna hagnaði á síðasta ári. Þetta kemur fram í ársreikningi hreppsins fyrir árið 2004 sem var afgreiddur í hreppsnefnd á dögunum. Er um að ræða nokkurn bata frá síðasta ári. Veltufjárhlutfallið var 2,57 en var árið 2003 1,15. Eigiðfjárhlutfallið hækkar úr 30,29% í 34,53% milli ára. Skuldir og skuldbindingar á íbúa eru
625 þúsund og lækka milli ára um 45 þúsund á íbúa. Rekstur málaflokka án vaxta og afskrifta voru 93% en var 94% árið 2003.
Eftirfarandi eru helstu tölur úr ársreikningnum og er tekið af www.vogar.is:
2004 2003
Heildartekjur samstæðu 343.702 303.204
Heildargjöld 314.939 301.727
Fjármagnsliðir 38.302 35.361
Niðurstaða án fjárm.l. 76.079 1.477
Rekstrarniðurstaða 37.777 -33.884
Eignir 893.693 891.801
Skuldir án lífeyrisskuldbindinga 541.614 578.228
Skuldir með lífeyrisskuldbindinga 585.059 621.673
Ársreikninginn í heild sinni er að finna á Vogar.is.
Þá voru auglýstar til umsóknar fjórar einbýlishúsalóðir við Lyngdal. Lóðirnar eru staðsettar í nýju hverfi sunnan megin í Vogum.Á heimasíðu hreppsins segir að umsækjendur skuli sækja um lóð við götuna án þess að tilgreina sérstaklega lóðanúmer. Allir umsækjendur sem standast almennar reglur um úthlutanir lóða í hverfinu geta sótt um, þó þannig að ekki er krafist greiðslumats fyrr en úthlutun hefur farið fram. Umsækjendum verður úthlutað númeri sem skipar þeim í forgangsröð við val á lóðum við götuna. Dregið verður úr úthlutuðum númerum á skrifstofu Sýslumannsins í Keflavík.
Frestur til að skila inn umsóknum er til 30. maí 2005 og mun hreppsnefnd taka umsóknirnar fyrir á fundi 7. júní 2005.
Gert er ráð fyrir að frágangi götunnar verði lokið 15. ágúst 2005 og að framkvæmdir á lóðunum geti þá hafist.
