Hafnargatan gerð vistlegri og fallegri

Yfirborðs- og verkfræðihönnun endurbóta á Hafnargötu í Keflavík er hafin og áætlað er að hefja framkvæmdir við fyrsta hluta götunnar á næsta ári, 2003. Þetta kemur fram í svari forstöðumanns umhverfis- og tæknisviðs Reykjanesbæjar við fyrirspurn Rúnars I. Hannah um fyrirhugaðar framkvæmdir við götuna. Rúnar lagði fyrirspurnina fram á vef Reykjanesbæjar.Rúnar spyr: Hvaða framkvæmdir eru fyrirhugaðar til fegrunar Hafnargötunnar, sem Kjartan Már Kjartansson minnist á, á heimasíðu Víkurfrétta? "Bæjarstjórn Reykjanesbæjar hefur mótað stefnu sína í enduruppbyggingu Hafnargötunnar. Undirbúningsvinna mun hefjast á þessu ári og ráðgert að framkvæmdir hefjist á næsta ári, 2003.
Kjartan Már Kjartansson,
formaður Markaðs- og atvinnuráðs Reykjanesbæjar"
Ég fagna því mjög ef taka á Hafnargötuna í gegn líkt og gert hefur verið við gamla bæinn.
Rúnar I. Hannah, Danmörku.

Forstöðumaður umhverfis- og tæknisviðs svarar: Þær framkvæmdir sem fyrirhugaðar eru á og við Hafnargötuna miða við í grófum dráttum að minnka umferðahraða, fjölga bílastæðum við götuna og gera hana vistlegri og fallegri.
Kannski ekki eins og gamla bæinn en eitthvað í þá áttina. Yfirborð- og verkfræðihönnun götunnar er hafin og áætlað er að hefja framkvæmdir við fyrsta hluta götunnar á næsta ári, (2003)