Hafna beiðni Landsnets um yfirráð yfir jörðum á Reykjanesi
Héraðsdómur Reykjaness hafnaði í síðustu viku beiðni Landsnets hf. um yfirráð yfir fjórum jörðum á Reykjanesi vegna framkvæmda við Suðurnesjalínu II. Frá þessu var greint á vef RÚV. Hæstiréttur mun skera úr um málið 20. apríl næstkomandi.
Landeigendur jarðanna á Reykjanesi telja það fara gegn ákvæði í stjórnarskrá og meðalhófsreglu stjórnskipunar- og stjórnsýsluréttar að Landsnet fái yfirráð yfir landi þeirra.
Áætlað var að framkvæmdir við Suðurnesjalínu II myndu hefjast í þessari viku. Landsnet hyggst leggja 46 metra háspennubelti og sex metra breiðan vegslóða um jarðirnar. Með línunni er ætlunin að flytja rafmagn til tveggja kísilverksmiðja sem munu rísa í Helguvík.
