Hafa merkt 250 hús í Garði og Sandgerði

Nú er verið að merkja síðustu húsin í Sandgerði í átaki sem félagsskapurinn Merkir menn hóf fyrir nokkrum árum. Verkefnið hófst í Garði með því að merkja hús sem eru byggð fyrir árið 1960. Húsin eru merkt nafni hússins og hverjir fyrstu ábúendur voru. Alls hafa Merkir menn merkt um 250 hús í Garði og Sandgerði.

Þegar lokið var við að merkja húsin í Garði var farið yfir í Sandgerði og haldið áfram með verkefnið þar. Í báðum byggðakjörnum Suðurnesjabæjar hefur verið reynt að fá sem upprunalegasta mynd af viðkomandi húsi. Það hefur reyndar ekki alltaf tekist.

Skiltin eru upplýsandi og mikilvæg fyrir söguna þar sem í eina tíð höfðu öll hús sitt nafn en í dag tilheyra húsin bara götum og götunúmeri.

Myndin að neðan var tekin þegar Baldurshagi var merktur. Baldurshaga þekkja flestir í dag sem Suðurgötu 1 í Sandgerði. Að ofan má svo sjá Merka menn við höfuðstöðvar hópsins í Oddshúsum í Garði með skilti Fuglavíkur.