Hætta á grjóthruni vegna jarðskjálftavirkni á Reykjanesskaga

Kröftug jarðskjálftahrina er í gangi á Reykjanesskaga. Stærsti skjálftinn varð kl. 10:05 í morgun 3,3 km SSV af Keili en hann var M5,7 á stærð. Margir stórir eftirskjálftar hafa orðið. Í jarðskjálftum sem þessum getur grjóthrun orðið og jafnvel skriður eða snjóflóð fallið. Eitthvað hefur verið um skriðuföll á Reykjanesi vegna skjálftanna. Meðal annars féll talsvert af grjóti yfir gamla Suðurstandaveginn sem nú er aflagður. Einnig hafa tilkynningar borist af grjóthruni í Þorbirni við Grindavík, úr Keili, við Djúpavatnsleið og við Kleifarvatn. Frá þessu er greint á vef Veðurstofu Íslands.

Jarðskjálftarnir í morgun hafa verið milli Kleifarvatns og Grindavíkurvegar. Mikil virkni hefur verið á því svæði frá því í janúarlok 2020 en aftur á móti hafa engir skjálftar fundist milli Kleifarvatns og Bláfjalla á þessu ári. Þar hafa í sögunni orðið skjálftar að stærð allt að M6,5. Hópstjóri náttúruvárvöktunar á Veðurstofunni segir það geta verið vísbendingu um að það svæði sé læst og losni ekki um spennu þar nema í stærri skjálfta.

Talin er hætta á áframhaldandi skjálftavirkni og að skjálftarnir gætu jafnvel orðið stærri. Lítill sem enginn snjór er í fjöllum vestan til á Reykjanesskaga, en svolítill snjór er í fjöllum austan og norðan við höfuðborgarsvæðið. Sá snjór er víða orðinn að harðfenni, en ofarlega í fjöllum er dálítið nýsnævi ofan á harðfenninu sem gæti verið óstöðugra. Ef skjálftavirknin heldur áfram er talin meiri hætta á grjóthruni en öðrum ofanflóðum. Ef skjálftavirkni færist austar stækkar áhrifasvæðið og nær þá u.þ.b. yfir Reykjanesskaga, norður í Hvalfjarðarsveit, umhverfis Þingvallavatn og austur að Þjórsá. Á því svæði eru mörg fjöll sem nýtt eru til útivistar, m.a. Esjan, Hengill, Ingólfsfjall, Vífilsfell, Helgafell og Keilir. Fólki er bent á að fara varlega í bröttum hlíðum og forðast svæði þar sem grjót eða snjór getur hrunið.