Hæg breytileg eða suðlæg átt

Í morgun voru norðan 8-15 m/s við ströndina austanlands, en annars staðar mun hægari norðlæg eða breytileg átt. Stöku él voru um norðaustanvert landið, skýjað norðvestanlands en bjartviðri sunnanlands. Frost var 0 til 13 stig á láglendi, kaldast á Þingvöllum.

Búist er við stormi á Grænlandssundi og Suðurdjúpi.

Norður af landinu er 1016 mb hæðarhryggur sem þokast austur. Um 1000 km suður af Hvarfi er vaxandi 986 mb lægð sem þokast NA.

Veðurhorfur til kl. 18 á morgun: Hæg breytileg eða suðlæg átt. Stöku él norðaustanlands í fyrstu, annars þurrt. Dálítil snjókoma eða éljagangur á Suðausturlandi og eins með vesturströndinni þegar kemur fram á daginn. Talsvert frost, nema við suður- og suðvesturströndina í dag. Á morgun verður ört vaxandi SA átt, víða 13-18 m/s síðdegis en hvassara við suðurströndina. Slydda eða rigning og allt að 6 stiga hiti sunnantil en snjókoma eða slydda og hlánar norðantil þegar líður á daginn.