Gyllt og gleðileg jól

Kristín Kristjánsdóttir í Kóda sagði að búðin væri að fyllast fyrir jólin og að hún ætti von á meiru á næstu dögum.
„Ég er búin að fá fullt af nýjum vörum á strákana; jakkaföt, peysur, skyrtur og fleira. Ég er líka búin að fá mikið af nýjum vörum á stelpur á öllum aldri en það verður allt í gulli fyrir þessi jól, aðallega gulltoppar og gullkjólar“, segir Kristín.
Tískan í ár er mjög breið að sögn Kristínar. Hvað litina varðar þá segir hún svart, lilla, gyllt, grænt og dökkappelsínugult vera vinsælasta nú í skammdeginu.
„Við erum að fá mikið af nýjum vörum í vikunni, m.a. stóra sendingu af skóm. Stígvélin verða áfram í tísku og bandaskórnir. Hælarnir verða af öllum gerðum og pinnahælarnir eru að koma sterkir inn aftur.“