Guðbergur spyr: Þarf í alvöru alvarlegt slys?

Guðbergur Reynisson, bæjarfulltrúi Sjálfstæðisflokks, sakar bæjarstjórn Reykjanesbæjar um að tefja nauðsynlegar umferðaröryggisumbætur við Fitjabraut og Fitjabakka og spyr hvort „þarf í alvöru alvarlegt slys eða jafnvel banaslys“ til að meirihlutinn bregðist við.

Bókun Guðbergs var lögð fram á fundi bæjarstjórnar 17. febrúar, þegar fundargerð umhverfis- og skipulagsráðs frá 6. febrúar var til umræðu. Þar gagnrýnir hann að „fund eftir fund“ sé rætt og rifist um aðgerðir sem ekki eigi að ráðast í og heldur því fram að starfsfólki Reykjanesbæjar hafi verið bannað að verja fjármunum í verkefnið.

Hann segir nauðsynlegt að setja meiri orku og fjármagn strax í umferðaröryggi, sérstaklega fyrir börn, og að taka „alvöru ákvarðanir“ sem móti umferðarmenningu til framtíðar í stað „endalausra plástra“ sem megi helst ekki kosta neitt. Í lok bókunarinnar skorar hann á meirihlutann, Samfylkingu, Framsókn og Beina leið,  að hætta að tala og fara að framkvæma.

Að bókuninni stóðu Guðbergur Reynisson, Alexander Ragnarsson og Birgitta Rún Birgisdóttir fyrir Sjálfstæðisflokk, auk Margrétar Þórarinsdóttur fyrir Umbót.