Grunur um fjársvik í Landsbankanum í Keflavík

Verið er að rannsaka grun um stórfelld fjársvik hjá Landsbankanum í Keflavík. Grunurinn beinist að því að starfsmaður bankans hafi tekið í sínar hendur nokkrar milljónir króna.
Ársæll Hafsteinsson, framkvæmdastjóri lögfræði- og útlánasviðs Landsbankans, segir að málið hafi komið upp í vikunni við eftirlit innri endurskoðunar bankans. Verið sé að fara yfir málið og kanna umfang þess. Hann segist ekki geta gefið upplýsingar um hve háar upphæðir sé um að tefla í þessu máli. Það kunni að vera eðlilega skýringar á sumum þáttum málsins sem séu til skoðunar og eins sé ekki búið að fara yfir allar færslur sem þurfi að rannsaka. Hann segir að viðkomandi starfsmaður sé ekki lengur við störf hjá bankanum.
Landsbankinn var ekki búinn að kæra málið til lögreglu í gær, en Ársæll segist eiga von á að það verði gert fljótlega, segir í Morgunblaðinu í dag.