Grunaður um tvær nauðganir með viku millibili

Nítján ára piltur hefur verið kærður fyrir tvær nauðganir gegn 15 ára stúlkum. Fyrra málið kom upp á Suðurnesjum í lok júlí þar sem lögreglan fór ekki fram á gæsluvarðhald. Sex dögum síðar var pilturinn handtekinn fyrir nauðgun í Reykjavík og var þá krafist gæsluvarðhalds. Fréttatíminn greindi frá málinu.

Seinna málið kom upp um síðustu helgi en þá á pilturinn að hafa nauðgað 15 ára stúlku í gleðskap í Grafarvogi. Stúlkan var flutt á Neyðarmóttöku fyrir þolendur kynferðisbrota á Landspítalanum og pilturinn var handtekinn á vettvangi í annarlegu ástandi. Daginn eftir vöknuðu grunsemdir um að pilturinn hefði framið fleiri kynferðisbrot. Í ljós kom að lögreglan á Suðurnesjum hafði mál til rannsóknar þar sem sami piltur er grunaður um að hafa nauðgað 15 ára stúlku, aðeins sex dögum áður. 

Í fyrra málinu var pilturinn handtekinn um kvöld og stúlkan fékk aðhlynningu á Neyðarmóttöku. Hann var yfirheyrður undir morgun og sleppt í kjölfarið. Lögreglan á Suðurnesjum taldi ekki ástæðu til að fara fram á gæsluvarðhald yfir piltinum.