Grindavíkur-app að fæðast
Fyrsta bæjarfélagið með app fyrir íbúa
Sérstakt Grindavíkur-app, eða smáforrit, er nú á lokastig og verður líklega komið í gagnið í janúar á næsta ári. Tilgangur Grindavíkur-appsins er að bæta þjónustu við bæjarbúa, en hugmyndin kom frá ungmennaráði Grindavíkur í haust. Ekkert sveitarfélag á landinu er með app eins og er, en við hönnun þess er m.a. horft til sambærilegs forrits vinabæjar Grindavíkur, Piteå í Svíþjóð.
Í appinu, sem verður viðburða-, upplýsinga- og fréttaapp, má finna upplýsingar um viðburði, hægt verður að komast í samband við bæjarstarfsmenn, tilkynna um bilanir, koma með ábendingar og ýmislegt annað. Þorsteinn Gunnarsson, sviðsstjóri frístunda- og menningarsviðs Grindavíkurbæjar, segir að tilkoma appsins muni bæta þjónustu við íbúana enn frekar.
