Grindavík: Endurskoðuð fjárhagsáætlun samþykkt

Bæjarstjórn Grindavíkur samþykkti endurskoðaða fjárhagsáætlun fyrir árið 2007 á síðasta fundi sínum.

í bókun meirihluta D- og S-lista kemur m.a. fram að rekstur málaflokka án fjármagnsliða versnar um 50,7 milljónir kr. Ástæður þess eru þær helstar að aukið er framlag til Saltfiskseturs um 25 milljónir króna og reiknuð leiga er að aukast um 31,4 milljónir króna. Á móti kemur aukning skatttekna að fjárhæð 33,8 milljónir króna.

Að meðtöldum fjármagnsliðum er rekstur A-hluta að batna um 3,4 milljarða og fer í 3,451 milljarð kr. sem skýrist af söluhagnaði hlutabréfa vegna Hitaveitu Suðurnesja og Bláa lónsins.

Afkoma B-hluta er tap að fjárhæð 32,6 milljónir. Munar þar mestu um tap Grindavíkurhafnar sem er 50 milljónir kr. og eykst um 2,2 milljónir frá upphaflegri áætlun. Í samanteknum hluta áætlunarinnar er hagnaður að fjárhæð 3,385 milljarðar kr.

Veltufé frá rekstri í samanteknum hluta er 3,6 milljarðar kr. en var 175,8 milljónir kr.
Eignfærð fjárfesting er áætluð í endurskoðaðri áætlun 812,8 milljónir kr. og er það aukning um 210,5 milljónir kr.

Miklar framkvæmdir standa fyrir dyrum í Grindavík á næstunni. Helstu framkvæmdir eru 209 milljónir í fjölnota íþróttahús. Í gatnagerð er áætlað 151 milljón. Framkvæmdir við veitukerfi og lagnir eru áætlaðar tæpar 60 milljónir. Auk þessa eru landakaup að fjárhæð 210 milljónir króna.

Til fjármögnunar framkvæmda er gert ráð fyrir lántöku að fjárhæð 566,0 milljónir.

Áætlunin var samþykkt með atkvæðum meirihluta, en fulltrúar minnihluta sátu hjá.