Gríðarleg aukning heimsókna á vef Reykjanesbæjar

Fjöldi heimsókna á vef Reykjanesbæjar (www.reykjanesbaer.is) jókst þrefalt á milli ára en alls voru gestir árið 2004, 72.492. Gestir árið 2003 voru 22.967 og er aukningin því 315%.

Aukninguna má að hluta til rekja til þess að endurbættur vefur fór í loftið í byrjun árs 2004 í vefkerfinu Vefþór frá Hugviti en þar var m.a. boðið upp á fleiri leitarmöguleika, aðgengilegra veftré og aðrar nýjungar s.s. fyrirspurnir, gagnasafn og dagbók. Einnig vann Sjá ehf. nytsemismat á vefnum þar sem metnir voru þeir þættir sem betur þyrfti að aðlaga þörfum notenda.

Virk vefmæling
Gestafjöldi er mældur hjá Modernus - virkri vefmælingu sem sýnir fjölda einstaklinga yfir daginn, í vikunni og í mánuði án þess að tvítelja nokkurn gest. Því teljast endurteknar heimsóknir frá sama gesti ekki með. Með þessu móti fást mjög nákvæmar og mikilvægar upplýsingar um raunverulegan fólksfjölda sem heimsækir vefinn yfir ákveðið tímabil.

Samkvæmt talningu fyrir árið 2004 var fjöldi innlita á árinu alls 91.137 og voru mánaðarlegir notendur að meðaltali 2.500 og 800 á viku.
Mest sóttu síðurnar eru: fundargerðir, fréttir og tilkynningar, umræða, fundargerðir og starfsmenn.

Flestir notendur slá beint inn léni Reykjanesbæjar. Einnig koma margir gestir frá www.vf.is, www.samband.is, google.com og leit.is svo eitthvað sé nefnt.

Flestir notendur íbúar Reykjanesbæjar
Flestir gestir eru skráðir hjá nwc.is (Netsamskipti) eða 30,59% sem þýðir að íbúar Reykjanesbæjar eru helstu notendur. Þar á eftir koma notendur sem skráðir eru hjá simnet.is eða 28,33%
Gestir koma flestir frá Íslandi eða 84,1% en þar á eftir koma Bandaríkin með 4,26%.
Flestir notendur 74,7% nota windows xp stýrikerfi.

Fjöldi innlita
Fjöldi innlita á árinu var alls 91.137
Flest voru innlitin í maí 8.280 og september 8.261.
Fæst innlit voru í desember 4.569 og júlí 5.408.

Af vef Reykjanesbæjar