Grettir vildi myndatöku

Ljósmyndari Víkurfrétta lenti heldur betur í skemmtilegu atviki nú á dögunum. Hann var við störf sín og stökk út úr bílnum og skildi hurðina eftir opna. Eftir nokkrar mínútur kallar vegfarandi á ljósmyndarann og spyr hann hvort hann sé með kött.

 

Ljósmyndarinn hélt nú ekki en þá svaraði vegfarandinn:„Þú ættir þá að kíkja á köttinn sem er í bílnum hjá þér.“ Haldið þið að hann Grettir hafi ekki komið sér vel fyrir í afturglugganum á vinnubílnum þar sem hann undi sér vel í hitanum. Ljósmyndaranum leist nú ekkert á þetta og bað hann vinsamlegast um að fara út úr bílnum. Sem hann og gerði en elti ljósmyndarann um eins og skugginn þar til hann steig upp í bílinn og ók í burtu.