Grét og var blóðug í andliti

Óskað var eftir aðstoð hjá Lögreglunni í Keflavík að húsi við Lyngholt snemma í morgun en þangað hafði komið grátandi kona sem var blóðug í andliti. Í ljós kom að sambýlismaður hennar hafði gengið í skrokk á henni en hún var flutt á HSS til skoðunar.

Í gær fékk Lögreglan í Keflavík tilkynningu um að það væri gaskútur ásamt gasslöngu hjá vatnstankinum hjá Aðalgötu í Keflavík. Lögreglumenn sóttu gaskútinn en eigandi hans kom skömmu síðar á lögreglustöðina og sótti hann. Lögreglan telur það ekki ólíklegt að sá eða þeir sem þarna voru að verki hafi tekið kútinn í þeim tilgangi að sniffa gas úr honum.

Í gær voru tveir ökumenn kærðir fyrir að nota ekki bílbelti við akstur.

Kl. 20:25 höfðu lögreglumenn afskipti af pilti sem var á torfæruhjóli fyrir ofan Eyjabyggð í Keflavík vegna aksturs utan vegar. Pilturinn var einnig réttindalaus og hjólið óskráð.

Kl. 02:00 var tilkynnt um þjófnað á Digital Sony myndavél. Hafði verið farið inn í ólæsta íbúð við Faxabraut og myndavélin tekin en hún var þar á borði.

Í nótt hafði Lögreglan í Keflavík afskipti af pilti sem var talsvert ölvaður á Faxabraut. Hann neitaði að segja til nafns og var færður á lögreglustöð. Kom í ljós að hann var aðeins 14 ára gamall. Hafðist upp á systir piltsins en hann hafði verið í umsjá hennar og vissi hún ekki betur en að hann væri sofandi inni í rúmi. Kom hún á stöð og sótti hann.

Einn ökumaður var kærður fyrir of hraðan akstur á Reykjanesbraut. Mældist hann á 128 km. hraða þar sem leyfður hámarkshraði er 70 km.