Gossvæðið opið

Eldgosasvæðið í Meradölum er opið.   Vinsamlega kynnið ykkur leiðbeiningar á safetravel.is á slóðinni:  https://safetravel.is/uncategorized-is/upplysingasida-vegna-eldsumbrota-a-reykjanesi?lang=is

Spá veðurvaktar um gasdreifingu

Suðvestan 5-10 m/s og stöku skúrir á gosstöðvunum í dag. Gasmengun berst til norðausturs í átt að höfuðborgarsvæðinu.

Suðaustan 8-15 um tíma í kvöld með rigningu og þá gæti einnig orðið vart við gasmengun á Vatnsleysuströnd.
Suðvestan og vestan 3-8 m/s á morgun og smá skúrir. Gasmengun berst til austurs og norðausturs og gæti orðið vart í Ölfusi og á höfuðborgarsvæðinu.

Mikilvæg skilaboð frá Veðurstofu fyrir þá sem ætla að fara að gosstöðvunum

• Gasmengun við gosstöðvarnar getur alltaf farið yfir hættumörk, mengunin leggst undan vindi og því öruggast að horfa til eldgossins með vindinn í bakið.
  
  
• Í hægviðri (<5 m/s) getur gas safnast fyrir í lægðum, þá stjórnast vindafar af landslagi og gas getur verið yfir hættumörkum langt upp í hlíðar, allan hringinn í kringum gosstöðvarnar. Í slíkum tilfellum þurfa áhorfendur að færa sig upp á fjöll og hryggi en ekki halda sig í brekkunum fyrir ofan.

Foreldrum með börn yngri en 12 ára verður snúið frá leið A af öryggisástæðum að svo stöddu.  Áætla má að ferðalagið taki að lágmarki 5 til 6 klukkustundir.  Gætt getur gasmengunar á gönguslóð og þá sérstaklega í nálægð við gosið.  Börn hafa minna þol gagnvart loftmengun og eru skilgreind sem viðkvæmur hópur.  Þá er ekki ráðlegt að börn dvelji lengur en 15 mínútur á stað þar sem loftmengun er yfir heilsuverndarmörkum, sjá upplýsingar á heimasíðu embættis landlæknis.

Börnum yngri en 12 ára er ekki hleypt að gosinu sjálfu og fylgjast viðbragðsaðilar með umferð við upphaf gönguleiðar A að gosinu.  Göngumenn fari gætilega og haldi sig fjarri hraunjaðri.  Þá er vakin athygli á því að enn er unnið að lagfæringum á þessari leið.