Góður hagnaður hjá Samkaupum

Samkaup var rekið með 146 milljóna króna hagnaði á síðasta ári. Fyrirtækið er þriðja stærsta verslunarkeðja eftir sameiningu við Matbæ, verslunardeild KEA á Akureyri, á síðasta ári.Sameining félaganna fór fram á síðasta ári og fór þannig fram að Samkaup eignaðist allt hlutafé Matbæjar og greiddi með hlutafjáraukningu. Guðjón Stefánsson, framkvæmdastjóri Samkaupa sagði árangurinn mjög viðunandi og að sameining félaganna hafi gengið vel. „Hagræðingin með sameiningunni er nú smá saman að skila sér í rekstrinum“, sagði Guðjón í ræðu sinni á aðalfundi Samkaupa sem haldinn var í sal Matarlystar í Keflavík nú síðdegis.
Heildarvörusala fyrirtækisins á árinu nam 8,3 milljörðum króna en hagnaður eftir skatta var 146 m.kr. eins og fyrr greinir og er 2,14% af veltu. Hjá Samkaupum starfa eftir sameininguna um 550 manns í rúmlega 300 stöðugildum. Kaupfélag Eyfirðinga og Kaupfélag Suðurnesja eru stærstu hluthafar Samkaupa, norðanmenn með 50%, KSK með 44,3%, einstaklingar á Suðurnesjum eiga mismuninn.
Guðjón greindi frá starfsemi fyrirtækisins á fundinum. Þar kom m.a. fram að framundan er opnun verslunar í Selahverfi í Kópavogi í næstu viku. Einnig er opnun fleiri verslana á teikniborðinu, m.a. í Mosfellsbæ. Þá er m.a. í undirbúningi bygging nýrrar verslunar í Gerðahreppi en þar hefur Samkaup rekið veslun í áratugi. Einnig er framundan opnun nýrrar verslunar á Ísafirði og endurnýjunar Nettóverslunar í Mjódd. Guðjón sagði að matvörumarkaðurinn nú væri meira að leita eftir ódýrari verslunum með minni þjónustu.