Glæsilegt hesthúsahverfi væntanlegt í Grindavík

Bæjarstjórn Grindavíkur samþykkti á síðasta fundi sínum deiliskipulagstillögu að nýju og glæsilegu hesthúsahverfi í Grindavík við Grenhól.

Skipulagstillagan þykir mjög metnaðarfull og gerir ráð fyrir að í framtíðinni verði möguleiki á að halda kynbótasýningar og Íslandsmót í Grindavík.

Á heimasíðu bæjarins segir að mjög fjölbreytt úrval verði af hesthúsastærðum og einstakt útsýni yfir Grindavík og út á Reykjanes verði úr kaffistofunum.

Síðan verða ræktuð upp beitarhólf fyrir aftan meirihluta hesthúsanna og er gert ráð fyrir skógrækt á svæðinu. Svæðið verður í góðri fjarlægð frá næstu íbúðarbyggð sem og fyrirhuguðum íbúasvæðum og stutt er í frábærar reiðleiðir allt um kring í stórbrotinni náttúru.

H: www.grindavik.is

 

Vf-mynd/elg: Hestamenn koma ríðandi til kjörfundar í sveitarstjórnarkosningum í Grindavík