Glæsileg flugsýning á laugardag

Á Ljósanótt í Reykjanesbæ sem fram fer dagana 2. - 5. september verður boðið upp á viðamikla flugsýningu sem verður einn af hápunktum hátíðarinnar.
Á hátíðinni sem haldin er ár hvert er boðið upp á ýmsar nýjungar og var ákveðið að bjóða til flugsýningar að þessu sinni.
Flugsýningin mun fara fram í Reykjanesbæ, við minnismerki sjómanna laugardaginn 4. september og hefst hún kl. 13:00 og stendur til 15:00.
Undirbúningur hefur verið töluverður en unnið hefur verið að sýningunni frá því í vor. Boðið verður upp á fjölda atriða og má þar nefna listflug, fisflug, þyrluflug, fallhlífarstökk, módelflug og karamellukast. Eftir flugsýninguna verða fisflugvélar til sýnis á flugmódelvellinum við Gróf.
Verkefnastjóri flugsýningarinnar er Tyrfingur Þorsteinsson.