Glæný Airbus A321ceo flugvél WOW air komin

Nýjasta vél WOW air lenti í morgun á Keflavíkurflugvelli en um er að ræða glænýja Airbus A321ceo og tók hún hringflug yfir Reykjavík í hádeginu. Flugvélin kemur beint frá verksmiðju Airbus í Hamborg og verður strax notuð í áætlunarflug. Vélin ber skráningarnúmerið TF-DOG en með heitinu heldur WOW air áfram að vísa til fjölskyldunnar enda er hundurinn jafnan sagður besti vinur mannsins og ómissandi á mörgum heimilum.

Í vélinni eru 208 sæti og og þar af átta svokölluð „Big Seat“ sem eru breiðari sæti með meira sætabili.  Vélin kemur til með að fljúga innan Evrópu og til Bandaríkjanna. Þetta er nítjánda vél WOW air en fyrir lok árs 2018 mun floti WOW air samanstanda af 24 nýjum Airbus flugvélum.

„Við tökum spennt á móti þessari nýju viðbót í flota WOW air. Það er ánægjulegt að geta boðið farþegum okkar upp á nýjasta flugflotann á Íslandi og á sama tíma haldið áfram að lækka flugverð,“ segir Skúli Mogensen stofnandi og forstjóri WOW air.

Wow vélin á Keflavíkurflugvelli. Ljósm. Friðrik Friðriksson.