Gjöld lækka í Grindavík

Bæjarstjórn Grindavíkur ákvað á fundi sínum í síðustu viku að lækka hlutfall lóðarleigu úr 1,6% af fasteignamati lóðar í 1,0% og lækka hlutfall fráveitugjalds íbúða skv. a-lið laga um tekjustofna sveitarfélaga úr 0,17% af fasteignamati í 0,15% af fasteignamati. Lóðarleiga af atvinnuhúsnæði skv. c-lið sömu laga mun lækka á sama hátt og íbúðarhúsnæði.
 
Með þessari lækkun er verið að núllstilla áhrif 15% hækkunar fasteignamats á íbúðir í Grindavík.

Áður en þessi tillaga meirihlutans var samþykkt var tillögu minnihluta, um að álagning fasteignaskatts, lóðarleigu og holræsagjalds verði lækkuð um 13% til að vega á móti hækkunum, felld.

Fulltrúar B- og F- lista sögðu í greinargerð með tillögunni að fasteignagjöld íbúðarhúsnæðis í Grindavík hafi tvöfaldast á síðustu árum og sé því kominn tími til að linni.

Á fundinum var þriggja ára fjárhagsáætlun bæjarins tekin til annarar umræðu þar sem bæjarstjóri fór yfir helstu stærðir áætlunarinnar. Hún var samþykkt með fjórum atkvæðum, en þrír sátu hjá.