Gistiheimili á Garðskaga slegið á frest

Hugmyndum um gistiheimili í vitavarðarhúsinu á Garðskaga var slegið á frest af nýjum meirihluta í bæjarstjórn Garðs í gær. Málinu hafði verið frestað til fyrsta fundar nýrrar bæjarstjórnar, þegar ljóst var að nýr meirihluti yrði í sveitarfélaginu.

Fráfarandi meirihluti hafði unnið í málinu um nokkurra mánaða skeið og því var það tillaga Gísla Heiðarssonar úr F-lista, sem nú skipar minnihluta í Garði, að samþykkja drög að leigusamningi um vitavarðarhúsið, sem gerði ráð fyrir að húsið yrði notað sem gistiheimili.

Einar Jón Pálsson vék af fundinum við afgreiðslu þessa máls. Tillagan var hins vegar felld með 4 atkvæðum N-listans sem lagði fram eftirfarandi tillögu:

„N-listinn leggur til að bæjarstjórn hafni drögum að leigusamningi sem lögð hafa verið fyrir bæjarstjórnarfund þann 12. júní 2006“.
Í greinargerð með tillögunni segir:  N-listinn telur nauðsynlegt að bæjarstjórn gefi sér meiri tíma og afli frekari upplýsinga, til að kanna þennan sem og aðra möguleika á nýtingu Vitavarðarhússins.

Tillagan var samþykkt með 4 atkvæðum N-listans, gegn atkvæðum F-listans.

Bókun frá F-listanum sem lögð var fram á fundinum:

„F-listinn telur að Vitavarðarhúsinu sé best varið fyrir gistiheimili fyrir ferðamenn og einnig skapi það atvinnu fyrir ferðamannaiðnað og íbúa Sveitarfélagsins Garðs. Þessar hugmyndir eru búnar að vera að þróast síðan Sveitarfélagið Garður keypti húsið. Skagaflös og Steinsstaðir sýndu strax áhuga að gera það að gistiheimili.
Þann 21. des 2005 var samþykkt í bæjarráði að bæjarstjóri fundaði með aðilum og einnig samþykkt samhljóða af bæjarstjórn í janúar 2006 þar á meðal af Arnari Sigurjónssyni í bæði skiptin.

Á fundi bæjarráðs þann 19. apríl 2006 var bæjarstjóra og byggingafulltrúa falið að gera leigusamning við Steinsstaði ehf. sem var samþykkt samhljóða af bæjarráði. Þessi samningur fólst í að Steinsstaðir geri upp húsið að innan fyrir kr. 9.750.000,- og fái staðinn leigusamning til 15 ára og sjái einnig um viðhald að innan á þeim tíma en Sveitarfélagið Garður sjái um viðhald að utan.  F-listinn telur að ekki þurfi lengri tíma til umhugsunar eða frests og bendir á að Steinsstaðir ehf. hafa staðið í kostnaðarsömum undirbúningi, meðal annars látið teikna húsið upp sem gistiheimili og fleira þar sem allir voru samþykkir þessu bæði í bæjarráði og bæjarstjórn“.