Gera hlé á krabbameinsleit hjá HSS

Vegna anna á ljósmæðravakt á Heilbrigðisstofnun Suðurnesja verður ekki boðið upp á krabbameinsleit þar í sumar. Að sögn Halldórs Jónssonar, forstjóra HSS, var ákveðið að gera hlé á leitinni vegna ófyrirséðrar manneklu fram til loka ágúst.

Boðið hefur verið upp á hefðbundna leit að frumubreytingum í leghálsi og hafa ljósmæður séð um að framkvæma skoðunina. Framkvæmdar hafa verið 12 til 15 skoðanir á mánuði og er konum bent á að snúa sér til Leitarstöðvar Krabbameinsfélagsins að Skógarhlíð 8 í Reykjavík þar til í lok sumars þegar aftur verður boðið upp á krabbameinsleit á HSS.