Gekk berserksgang í versluninni og ógnaði eigendunum með öxi

Eigendur Úra- og skartgripaverslunar Georgs V. Hannah segja að það hafi verið mjög óskemmtileg reynsla að fá mann inn í verslunina vopnaðan öxi en hann gekk berserksgang, braut og bramlaði afgreiðsluborð, peningakassa og fleira og endaði svo á því að henda öxinni inn í glerskáp með tilheyrandi brotum og látum.

„Ég upplifði okkur kannski ekki í lífshættu þó vissulega höfum við verið það. Ég hafði meiri áhyggjur af gömlu hjónunum, mömmu og pabba, því maðurinn hélt á öxi og sveiflaði henni að okkur þar sem við stóðum í hurðaropinu inni í búðinni,“ segir Eggert Hannah, gullsmiður en hann tók við rekstri verslunarinnar fyrir þremur árum. Þau Georg og Eygló sem nú starfa í búðinni í hlutastarfi segjast aldrei hafa lent í öðru eins.

Nánar í nýjasta tölublaði Víkurfrétta sem má sjá hér í stafrænni útgáfu en einnig í pappírsútgáfu sem er dreift miðvikudag og fimmtudag inn á öll heimili og fyrirtæki á Suðurnesjum.

Árásarmaðurinn var vopnaður öxi sem hann notaði í innbrotinu en var einnig með stóra sveðju og járnstöng í poka. Feðgarnir Georg og Eggert segjast vera að jafna sig eftir árásina en þeir náðu að opna verslunina strax daginn eftir. Á myndinni að neðan sem tekinn var nokkrum dögum síðar má sjá þá í búðinni þar sem árásarmaðurinn gekk berserksgang, braut og bramlaði með öxinni og ógnaði fegðunum með henni þegar þeir reyndu að fá hann til að hætta.