Gefa skít í fyrsta stopp á ferð sinni um landið

Áður en lengra er haldið er ástæða til að vara við myndum með þessari frétt. Þær sýna umhverfi og aðstæður sem ferðafólk notar til að ganga örna sinna í næsta nágenni við Flugstöð Leifs Eiríkssonar.  Sérstaklega er varað við neðstu myndinni!

Ferðamenn gefa skít í fyrsta og síðasta stopp á leið sinni um Ísland og það í orðsins fyllstu merkingu. Aðeins um kílómetra frá Flugstöð Leifs Eiríkssonar er staldur með bílastæðum fyrir bíla og rútur. Þar er hlaðinn skjólgarður, bekkir og borð. Þá er fallegur trjágróður á staðnum og ruslatunnur.

Fjölmargir ferðamenn stoppa á þessu fyrsta staldri þegar komið er frá flugstöðinni eða nota sem síðasta stopp fyrir flug. Þarna sefur fólk í bílum sínum yfir nótt en á staðnum er engin hreinlætisaðstaða. Þrátt fyrir að hægt sé að komast á salerni í flugstöðinni sem er í aðeins um kílómetra fjarlægð þá kjósa margir að ganga örna sinna á bakvið hlaðna steinveggi eða innan um trjágróður á staðnum.

Rútubílstjóri stoppaði með hóp ferðamanna þarna í morgun, enda veðurblíðan mikil og áhugi hjá ferðafólkinu að anda að sér fersku loftinu og njóta umhverfisins. Bílstjórinn hafði samband við Víkurfréttir og hafði ekki góða sögu að segja af svæðinu. Fólkinu mætti ekki ferskur andvari heldur megn skítalykt. Bílstjórinn fékk strax spurningu frá ferðamanni hvaða lykt þetta væri og við nánari skoðun kom í ljós að mannaskítur var víða á svæðin og sjá mátti klósettpappír og þurrkur við steinhleðslu á svæðinu og við trjágróðurinn á svæðinu. Bílstjórinn sagði aðstæður mjög óaðlaðandi og var fljótur í burtu með sinn hóp.

Umhirða á svæðinu er á ábyrgð Sandgerðisbæjar.

Trjágróður á svæðinu veitir skjól þeim sem þar ganga örna sinna.



Í rjóðri inn á milli trjánna hefur fólk létt á sér...

Við vöruðum við myndunum í upphafi fréttarinnar! Hér hefur einhver stigið í mannaskít á svæðinu sem er frekar hugsað sem staldur til að setjast niður og njóta matar en ekki til að ganga örna sinna.