Gatan gaf sig undan búkollu
Kirkjustígur í Grindavík gaf sig undan svokallaðri búkollu þegar unnið var að því að álagsprófa götuna og aðrar götur á lokuðum svæðum fyrr í dag. Búið er að ná vinnuvélinni upp úr sprungunni og ökumanni hennar varð ekki meint af.
Frumniðurstöður jarðkönnunnarverkefnis almannavarnardeildar Ríkislögreglustjóra liggja fyrir vegna fasa 1 í verkefninu í vesturhluta Grindavíkurbæjar, þ.e. vestan Víkurbrautar. Í fasa 1 eru allar götur sjónskoðaðar og mældar með jarðsjáum.
Fyrst er farið yfir göturnar með jarðsjá sem nær niður á 4-4,5 m dýpi. Öll svæði sem gáfu til kynna möguleg holrými voru síðan mæld með öflugri jarðsjá sem nær niður á 10-15 m dýpi.
Þau svæði þar sem vísbendingar eru um holrými og óvissa er um eða þau talin hættuleg í kjölfar rannsóknanna verða girt og/eða merkt sérstaklega af almannavörnum. Almannavarnir fólu öryggisstjóra á vettvangi að girða af nokkur af þessum svæðum.
Grindavíkurbær tekur nú við svæðunum og metur hver næstu skref eru m.t.t. mótvægisaðgerða.
Sveitarfélagið hefur þegar hafið vinnu, í samvinnu við sérfræðinga frá Verkfræðistofunni Eflu, aðgerðarstjórn og vettvangsstjórn, að undirbúningi mótvægisaðgerða. Þá mun jarðkönnunarhópur almannavarna kanna þessi svæði betur.
Mótvægisaðgerðirnar til skemmri tíma geta verið eftirfarandi:
Girðing fjarlægð og svæði merkt þar sem fólk er hvatt til að fara um svæðið með varúð enda komi í ljós við frekari greiningu á gögnum að holrými séu ekki talin hættuleg akandi umferð.
Bráðabirgðaaðgerð á yfirborði götu t.d. með stálplötum, brú eða öðru, þannig að umferð komist um götuna.
Umræddar girðingar valda því að umferðarflæði í Grindavík er breytt og mikilvægt að íbúar séu upplýstir um það, sér í lagi þegar kemur að flóttaleiðum.
Eftirfarandi er mikilvægt fyrir íbúa að hafa upplýsingar um í kjölfar ofangreinds:
Göturnar Sunnubraut og Kirkjustígur eru lokaðar vegna girðinga.
Aðgengi að Laut og Dalbraut er um göngustíg frá Ásabraut.
Aðgengi að Fornuvör er um flóttaleið frá Nesvegi
Flóttaleið frá Ásabraut er lokuð öðrum en þeim sem búa við Fornuvör.
Hringakstur um Glæsivellir/Ásvelli er lokaður.
Víkurbraut er lokuð neðan frá Kvennó niður fyrir Sunnubraut.
Ljóst er að umræddar lokanir hafa áhrif íbúa Grindavíkurbæjar, sér í lagi við Sunnubraut og Kirkjustíg. Grindavíkurbæjar kappkostar að vinna í mótvægisaðgerðum þannig að hægt verði að koma umferð á þau svæði sem í dag sæta lokunum sem allra fyrst.
Íbúar sem eiga fasteignir sem sæta takmörkuðu aðgengi geta komið við hjá vettvangsstjórn í björgunarsveitarhúsinu við Seljabót 10 og rætt við öryggisstjóra á vettvangi um málið.
Unnið er að uppfærslu á afgirtum svæðum og flóttaleiðum inn á kortavef/sprungjusjá Eflu, sjá hér.
Að öðru leyti varðandi aðgengi íbúa að bænum er vísað til reglulegra tilkynninga lögreglustjórans á Suðurnesjum.
