Garður sker sig úr með góða fjárhagsstöðu

Bæjarstjórn Sveitarfélagsins Garðs tekur undir lokaorð skýrslu frá Haraldi L. Haraldssyni hagfræðingi um að Sveitarfélagið Garður skeri sig nokkuð frá öðrum sveitarfélögum hvað góða fjárhagsstöðu varðar. Haraldur vann rekstrarúttekt á Sveitarfélaginu Garði. Úttektin var tekin fyrir á síðasta fundi bæjarstjórnar Garðs.

Jafnframt tekur bæjarstjórn undir að hagræða þarf í rekstri þannig að til framtíðar litið verði framkvæmdir og fjárfestingar fjármagnaðar með fjármunum frá rekstri og án nýrra lántaka.
 

Bæjarstjórn bendir á að samkvæmt úttektinni eru gjöld og skattar almennt lág hjá sveitarfélaginu í samanburði við önnur sveitarfélög. Ef þau markmið nást sem felast í tillögum um hagræðingu í rekstri, þá mun Sveitarfélagið Garður hafa nokkra sérstöðu meðal sveitarfélaga, nánast skuldlaust með lágar álögur á íbúana og fjárfestingar fjármagnaðar með fé úr rekstri, án lántaka. Náist þetta fram að ganga verður Sveitarfélagið Garður fyrirmyndar sveitarfélag og mörgum öðrum sveitarfélögum til eftirbreytni, segir í afgreiðslu bæjarstjórnar Garðs á rekstrarúttekt Haraldar.