Garður: Langtímaskuldir í sögulegu lágmarki
Ásmundur Friðriksson, bæjarstjóri í Garði, segir niðurstöðu ársreiknings 2011 vera ásættanlega í ljósi stöðunnar í þjóðfélaginu. Fyrri umræða um reikninginn fór fram í bæjarstjórn Garðs í gærkvöldi. „Hjól atvinnulífsins standa enn föst, en þrátt fyrir það hafa tekjur sveitarfélagsins aukist umfram áætlun um 33 mkr. og hafa hækkað um tæp 10% frá fyrra ári.
Aðhaldi var beitt í rekstri sveitarfélagsins á árinu, skuldir greiddar niður um 427,8 mkr. en langtímaskuldir bæjarins eru í sögulegu lágmarki í árslok, en þær nema 256 mkr. Handbært fé í sjóði nam 675 mkr., en þar af eru innistæður framtíðarsjóðs 530 milljónir. Staða Sveitarfélagsins Garðs er því mjög góð miðað við stöðu sveitarfélaga á Íslandi í dag. Það er mikilvægasta verkefni bæjarstjórnar nú að ná jöfnuði í rekstri en lítið vantar á að svo verði. Nauðsynlegt er að auka tekjur sveitarfélagsins með því að atvinnulífinu verði sköpuð skilyrði svo til verði fleiri betur launuð störf hér á svæðinu og halda kostnaði í lágmarki. Það er markmiðið sem stefnt er að,“ segir Ásmundur í greinagerð sinni.
Helstu niðurstöðutölur ársreiknings 2011 eru:
Skatttekjur og framlög jöfnunarsjóðs 730.344.000
Gjöld samstæðureiknings án afskrifta 803.897.000
Rekstrarniðurstaða án fjármunatekna/gjalda (55.644.000)
Fjármunatekjur umfram fjármagnsgjöld 32.478.000
Rekstrarniðurstaða: (23.166.000)
Skuldir og skuldbindingar samtals: 668.265.000
Eignir samtals: 3.221.257.000
Handbært fé frá rekstri 97.573.000
Handbært fé í árslok: 675.108.000
Í greinargerð bæjarstjóra kemur fram að rekstrartekjur ársins 2011 hækka um 59 mkr. eða úr 767 mkr. í 826 mkr. frá árinu 2010.
Laun og launatengd gjöld ársins 2011 hækka um 12 mkr. milli áranna 2010 og 2011 eða úr 369 mkr. í 381 mkr. Þar munar mestu um tæplega 18 mkr. starfslokasamning forstöðumanns sem allur er gjaldfærður á árinu og almennar launahækkanir sem óvissa var um við fjárhagsáætlunargerð en hækkun launakostnaðar vegna þeirra nam 15 mkr.
Á móti kemur veruleg hagræðing frá árinu 2010 en hún kom ekki að fullu til framkvæmda fyrr en á árinu 2011.
Annar rekstarkostnaður lækkar úr 469 mkr. í 422 mkr. eða um 47 mkr. með almennu aðhald í rekstri og hagræðingu. Þar sýndu forstöðumenn, skrifstofustjóri og bæjarstjóri stuðning við markmið bæjarstjórnar að ná niður kostnaði og tóku á sig 10% starfshlutfallsskerðingu á árinu 2011. Þeim forstöðumönnum sem tóku þátt í þeirri launaskerðingu er þakkaður stuðningur og samstöðu við að ná markmiðum fjárhagsáætlunar.
Forstöðumenn og starfsfólks bæjarskrifstofunnar hafa lagt sig fram um að bæta upplýsingastreymi úr bókhaldi og allir verið samtaka um að ná þessum góða árangri sem er ekki síst þeim að þakka. Þessi árangur næst vegna þeirra breytinga sem gerðar voru á starfsferlum á bæjarskrifstofunni, en nú fá forstöðumenn stofnana mánaðarlega rekstrartölur næstliðins mánaðar og virkt eftirlit er því með rekstrinum. Enn mun skrifstofan verða betur í stakk búinn til að veita nýrri og betri upplýsingar úr bókhaldinu en nú er unnið að uppsetningu nýs bókhaldskerfis sem mun bæta upplýsingagjöf og einfalda allar skýrslugerðir.
Tekjur Framtíðarsjóðs voru 512 mkr. árið 2008 en 21 mkr. árið 2011, sjóðurinn er í dag um það bil 25% af því sem hann var árið 2008, á móti er sveitarfélagið skuldlaust. Afborganir langtímalána voru fyrir uppgreiðslu lánanna um 80 milljónir á ári en eru 9,8 mkr. 2011.
Það er ljóst að niðurstaða ársreiknings 2011 sýnir að rekstur sveitarfélagsins er á réttri leið og nálgast jafnvægi sem er það markmið sem stefnt er að. Ársreikningi 2011 hefur verið vísað til síðari umræðu á næsta fundi bæjarstjórnar.
