Garðmönnum hefur fækkað

Þann 1. desember í fyrra höfðu 1412 einstaklingar lögheimili í Garði samkvæmt íbúaskrár Þjóðskrár. Garðmönnum hafði þá fækkað um 16 talsins frá árinu áður þegar þeir voru 1428 talsins. Búast má við að flutningur heimilismanna á Garðvangi yfir á hjúkrunarheimili Hrafnistu á Nesvöllum muni hafa nokkur áhrif þegar næsta mæling verður gerð í desember nk.
 

Garðmönnum hefur fækkað nokkuð síðustu ár en þann 1. desember árið 2011 voru 1484 með lögheimili í Garði. Fækkun fólks með lögheimili í Garði má helst rekja til þess að erlendum íbúum fækkaði í kjölfar efnahagsþrenginga.