Garðmenn kalla yfirmenn Landsbankans á teppið
– Landsbankinn hættir þjónustuheimsóknum í Garðinn
Tölvupóstur frá útibússtjóra Landsbankans í Reykjanesbæ var lagður fyrir bæjarráð Garðs í gær þar sem tilkynnt er sú ákvörðun bankans að síðasti dagur þjónustuheimsókna Landsbankans í Garði verði þriðjudaginn 30. september 2014.
„Bæjarráð Garðs mótmælir harðlega þeirri ákvörðun Landsbankans að leggja af bankaþjónustu í Garði. Gangi þessi ákvörðun bankans eftir verður engin bankaþjónusta í sveitarfélagi sem telur yfir 1.400 íbúa og er það algerlega óásættanlegt. Bæjarráð felur bæjarstjóra að kalla yfirmenn Landsbankans til fundar um málið hið fyrsta,“ segir í bókun bæjarráðs á fundinum.
