Gagnrýna harðlega styttingu bótatíma
– útgjöldin leggjast þyngst á sveitarfélög á Suðurnesjum
Sveitarstjórnarmenn á Suðurnesjum gagnrýna harðlega tillögur í fjárlagafrumvarpi ársins 2015 um að stytta hámarksbótatíma atvinnulauss fólks úr þremur árum í tvö og hálft ár án þess að til komi fjárframlög á móti til sveitarfélaganna. Þetta kemur fram í ályktun sem samþykkt var á aðalfundi Sambands sveitarfélaga á Suðurnesjum, sem haldinn var í Vogum um nýliðna helgi.
„Með áformum um styttingu hámarksbótatíma er verið að velta 500 milljóna króna útgjöldum frá ríki til sveitarfélaga. Búast má við að þessi útgjöld leggist þyngst á sveitarfélög á Suðurnesjum þar sem atvinnuleysi mælist enn mest á landinu,“ segir í ályktunni.
Aðalfundur Sambands sveitarfélaga á Suðurnesjum hvetur til þess að í stað þess verði unnið með sveitarfélögunum að lausn atvinnuleysisvandans og eflingu endurhæfingarúrræða fyrir langtímaatvinnulausa.
Þá lýsir aðalfundurinn vonbrigðum sínum með þær lækkanir á framlögum til sóknaráætlana landshluta sem birtast í fjárlagafrumvarpinu.
