Gagnrýna harðlega kaup bæjarins á Rammahúsinu

Bæjarfulltrúar minnihlutans í bæjarstjórn Reykjanesbæjar gagnrýna harðlega þá ákvörðun meirihlutans að ráðast í kaup á Rammahúsinu svokallaða fyrir 75 milljónir króna á sama tíma og fyrirhugað sé að skera niður velferðarþjónustu. Málið kom til afgreiðslu bæjarstjórnar í gær en hafði áður verið samþykkt með atkvæðum meirihlutans í bæjarráði.

Sveindís Valdimarsdóttir, bæjarfulltrúi A-lista, sagðist vera orðlaus yfir þessari ákvörðun enda væri hún alveg með ólíkindum. Þrátt fyrir það ástand sem komið væri upp í þjóðfélaginu væri meirihluti Sjálfstæðismanna að kaupa eignir jafnvel þó ekki væri vitað í hvað ætti að nota þær.  Á sama tíma blasti við niðurskurður í velferðarmálum.

Böðvar Jónsson, bæjarfulltrúi Sjálfstæðismanna, var til svars fyrir meirihlutann og sagði fjórar meginástæður fyrir kaupum á eigninni. Í fyrsta lagi til að tryggja hagsmuni bæjarins vegna ógreiddra fasteignagjalda sem hvíldu á eigninni. Að öðrum kosti væri hætta á að lögveð rynni út á tíma. Í öðri lagi væri bærinn að trygga sína aðkomu að því með hvaða hætti húsið yrði nýtt í framtíðinni og hvaða starfsemi færi þar fram.  Í þriðja lagi væri um umhverfismál að ræða en utan á húsinu væri tankur sem verið hefði þyrnir í augum marga. Hann yrði fjarlægður. Í fjórða lagi nefndi hann að uppi væri ýmsar hugmyndir um nýtingu hússins þó ekkert hefði verið ákveðið ennþá. Reykjanesbæ vantaði húsnæði undir ýmsa starfsemi.