Gæsluvarðhalds krafist vegna árásar

Lögreglustjóri Suðurnesja hefur krafist gæsluvarðhalds yfir tveimur karlmönnum vegna fólskulegrar árásar í Reykjanesbæ í gærkvöldi. Héraðsdómari tók sér sólarhringsfrest til að úrskurða um varðhaldið. Mennirnir hafa margoft komið við sögu lögreglunnar áður, að sögn lögreglunnar á Suðurnesjum. Frá þessu er greint á mbl.is

Málið er litið afar alvarlegum augum en mennirnir tveir, sem eru á þrítugsaldri, gengu í skrokk á hjónum á sjötugsaldri og dóttur þeirra. Árásin átti sér stað fyrir utan heimili þeirra í Reykjanesbæ. Fólkið átti ekkert sökótt við mennina og ekki er ljóst hvað þeim gekk til. Þó er hugsanlegt að þeir hafi farið mannvillt við handrukkun.

Fólkið hlaut margvísleg meiðsl, meðal annars nefbrot og handleggsbrot. Talið er að þeir hafi notast við vopn. Lögregla hafði upp á mönnunum þar sem fórnarlömbin gátu gefið góða lýsingu af þeim, segir í frétt mbl.is