G-strengir og aðskotahlutir í öryggisviku á Keflavíkurflugvelli

Isavia leggur ríka áherslu á öryggismál og að allt starfsfólk taki virkan þátt í að tryggja öryggi á vinnustaðnum. Til að efla þennan þátt var haldin Öryggisvika dagana 1.–5. október 2018. Í Öryggisvikunni var boðið uppá ýmsa viðburði til að efla þekkingu og vitund varðandi öryggismál.

 

Eitt af verkefnum sem starfsmenn fyrirtækja í flugþjónustu við Keflavíkurflugvöll sameinuðust um í vikunni var ganga um flughlöð og flugvélabrautir þar sem týndir voru upp aðskotahlutir en jafnvel smáir aðskotahlutir geta valdið miklu tjóni.

 

Kunnasta dæmið um slíkt er þegar Concorde-þota fórst eftir flugtak í Frakklandi árið 2000 en aðskotahlutur á flugbraut sprengdi hjólbarða sem síðan gerði gat á eldsneytistank og eldur braust út í vélinni við flugtakið.

 

Það var myndarlegur hópur sem tók þátt í hreinsunarverkefninu og það voru hreint ótrúlegustu hlutir sem fundust. Málmhlutir á flughlaði geta valdið skaða en g-strengir sem fundust eru ráðgáta, enda ekki ljóst hvernig fólk getur glatað undirfatnaði sínum á leiðinni út í flugvél.

 

 

Myndarlegur hópur starfsfólk við flugvöllinn sem tók þátt í hreinsunarverkefni þar sem leitað var aðskotahluta.

 

Plokkað á flughlaðinu.