Fyrstu hraunhellunni lyft

Í tilefni af upphafi framkvæmda vegna stækkunar upplifunarsvæðis og byggingar nýs hótels Bláa Lónsins, var fyrstu hraunhellunni lyft við sérstaka athöfn á þriðjudag. Edvard Júlíusson, varaformaður stjórnar Bláa lónsins, lyfti hraunhellunni ásamt Ragnheiði Elínu Árnadóttur, iðnaðar- og viðskiptaráðherra. 
„Það er mér sannarlegt gleðiefni að vera viðstödd hér í dag þegar framkvæmdir hefjast við stækkun upplifunarsvæðis og byggingu nýs hótels. Það hefur verið gaman að fylgjast með vextinum hér í Bláa lóninu á undanförnum árum. Hér er öll umgjörð til mikillar fyrirmyndar og sú viðbót sem er verið að byrja á í dag styrkir ferðaþjónustu á þessu svæði og í raun á Íslandi öllu,“ sagði Ragnheiður Elín Árnadóttir iðnaðar- og viðskiptaráðherra við þetta tækifæri.

 

Heildarkostnaður vegna framkvæmdarinnar nemur 6 milljörðum króna. Mannvirki Bláa Lónsins munu tvöfaldast að stærð. Heildarstækkun á núverandi- og nýju upplifunarsvæði ásamt hóteli nemur um 10.000 fm. Á framkvæmdatíma, sem áætlað er að verði tvö ár, munu 150 starfsmenn starfa við verkefnið.

 

   

Eitt hundrað ný störf í ferðaþjónustu


Gert er ráð fyrir 100 nýjum störfum í tengslum við stækkun upplifunarsvæðis Bláa Lónsins og mun hluti starfsfólks hefja störf á framkvæmdatíma. Störfin verða fjölbreytt, en eins og önnur störf hjá fyrirtækinu munu þau miða að því að veita gestum Bláa Lónsins góða og fágaða þjónustu. Hluti starfanna sem verða til við stækkunina munu kalla á háskólamenntað fólk og starfsmenn með  sérþekkingu á sviði heilsu og vellíðunar. Hjá Bláa Lóninu starfa um 300 starfsmenn á ársgrunni. Að framkvæmdum loknum er gert ráð fyrir því að heildarstarfsmannafjöldi verði 400.  

 

Stækkun og endurhönnun núverandi upplifunarsvæðis


Nýtt upplifunarsvæði verður byggt inn í hraunið vestur af núverandi lóni, og mun svæðið tengja núverandi lón og lúxushótel. Með tilkomu hótelsins verður fyrsta flokks gisting hluti af  upplifun Bláa Lónsins. Í hótelinu er gert ráð fyrir 60 herbergjum, veitingastað og fjölnota fundarsal.  

 

Stækkun og endurhönnun núverandi upplifunarsvæðis er mikilvægur þáttur í uppbyggingunni, en lónið sjálft verður stækkað um helming. Ný og glæsileg aðstaða fyrir spa meðferðir sem boðið er upp á ofan í Lóninu er hluti stækkunarinnar.  
Hluti endurhönnunar felst einnig í enn betri hitastýringu á lóninu sjálfu auk þess sem aðgengi að hreinlætisaðstöðu á lónssvæðinu verður aukið. Verkefnið er í takt við þróun Bláa Lónsins undanfarin ár þar sem jafnt og þétt hefur verið unnið að því að auka úrval og gæði þjónustu.

 

Jarðvegsframkvæmdir munu hefjast í árslok og áætlað er að uppbyggingunni verði lokið vorið 2017.

 „Uppbyggingin er táknræn fyrir áherslu Bláa Lónsins um að styrkja stöðu sína sem einstakur viðkomustaður ferðamanna á heimsvísu. Ísland þarf í auknum mæli að horfa til þess að höfða til fólks sem leitar eftir miklum gæðum í þjónustu og aðbúnaði. Bláa Lónið vill halda áfram forystu í því að leiða íslenska ferðaþjónustu enn frekar á þær brautir og stuðla þannig að aukinni samkeppnishæfni Íslands á alþjóðlegum ferðamannamarkaði,“ sagði Grímur Sæmundsen, forstjóri Bláa Lónsins.


 

Nokkur hópur var viðstaddur. 

 

Hönnun og arkitektúr


Sigríður Sigþórsdóttir hjá Basalt arkitektum er aðalhönnuður verkefnisins, en hún er arkitekt allra mannvirkja Bláa lónsins. Sigríður hefur starfað með Bláa lóninu í tæplega tvo áratugi eða allt frá því að undirbúningur að núverandi mannvirkjum hófst um miðjan tíunda áratuginn. Hönnun Sigríðar fyrir Bláa Lónið hefur vakið athygli hér heima og erlendis, ekki hvað síst fyrir samspil hins manngerða og náttúrulega umhverfis.  

 

„Byggingar Bláa Lónsins eru hraunbúar. Þær eru byggðar inn í hraunið, taka upp drætti og form úr náttúru staðarins. Nýjasti áfanginn er þar engin undantekning,“ segir Sigríður.
Upplifunarhönnun er órjúfanlegur þáttur af hönnun Bláa lónsins og hefur teymi starfsfólks fyrirtækisins, ásamt Sigurði Þorsteinssyni og fyrirtæki hans Design Group Italia, unnið að þeim þætti hönnunarinnar. Sigurður, sem er búsettur í Milano á Ítalíu, hefur unnið með Bláa Lóninu undanfarin tuttugu ár og stýrt þróun vörumerkis, ímyndar og upplifunar í samvinnu við stjórnendur Bláa Lónsins.