Fylla á með ódýrara eldsneyti

Þar sem kaupæði rann á bíleigendur á Suðurnesjum í gærkvöldi og þeir mynduðu langar raðir við eldsneytisdælur í þeirri trú að eldsneyti væri að hækka í dag, fór svo að mjög gekk á eldsneytisforða stöðvanna. Í morgun mátti sjá eldsneytisflutningabíl fylla á stöð Atlantsolíu í Njarðvík. Fáir hafa hins vegar sést taka eldsneyti, enda allir með fulla tanka af eldsneyti sem fæst fyrir allt að 13 krónum LÆGRA verð í dag en í gærkvöldi.

Myndin er tekin þegar verðið var enn það sama og í gærkvöldi en skömmu eftir að myndin var tekin lækkaði verðið hjá Atlantsolíu, þannig að jeppaeigendurnir á myndinni hefðu getað sparað nokkuð margar krónur með því að vera aðeins seinna á ferðinni. VF-mynd: Hilmar Bragi Bárðarson