Fullfrískur í stæði fyrir fatlaða

Í gærdag voru fjórir ökumenn kærðir fyrir hraðakstur í umdæmi lögreglunnar í Keflavík.  Þrír á Reykjanesbraut og einn á Sandgerðisvegi.  Sá sem hraðast fór var mældur á 124 km þar sem hámarkshraði er 90 km.

Einn ökumaður var stöðvaður vegna gruns um ölvun við akstur.  Eitt umferðaróhapp varð í umdæminu.  Engin slys urðu á fólki.  Einn ökumaður var kærður fyrir að leggja í stæði sem er sérmerkt fyrir fatlaða utan við Heilbrigðisstofnun Suðurnesja.  Eigendur tveggja ökutækja voru boðaðir með bifreiðar sínar til skoðunar.  Þeir höfðu ekki sinnt því að færa þær til aðalskoðunar á réttum tíma.
Á kvöldvaktinni varð eitt umferðaróhapp í umdæminu.  Engin slys urðu á fólki.  Einn ökumaður var kærður fyrir að vera ekki með öryggisbelti við aksturinn.