Frítt fyrir alla bæjarbúa í sund í Sandgerði

Bæjarstjórn Sandgerðisbæjar samþykkti í gær samhljóða að allir íbúar Sandgerðisbæjar fái frían aðgang að sundlaug Íþróttamiðstöðvarinnar í Sandgerði frá 15. febrúar, um óákveðinn tíma, eða þar til henni verður lokað vegna byggingarframkvæmda og stækkunar á íþróttamiðstöð og sundlaug sem nú stendur fyrir dyrum.

Greinargerð:

Bæjarstjórn hefur nú þegar hafið heilsuátak á meðal starfsmanna bæjarfélagsins.
Með ofanritaðri ákvörðun bæjarstjórnar er verið að leggja frekari grunn að heilsuátaki bæjarbúa óháð aldri.

Auk þess er bæjarstjórn að leggja áherslu á þá ákvörðun að tímabært er að hefja uppbyggingu á nýrri sundlaug fyrir bæjarbúa.

Með því að fella niður aðgangseyrir að sundlaug bæjarfélagsins leggur Sandgerðisbær sitt af mörkum til að hvetja bæjarbúa til að stunda holla hreyfingu.