Fréttavikan: Blóð í boltanum, mjólkurkú ríkisins og Silkitoppa á ferð

Margt bar á góma í fréttum vikunnar á vf.is þar sem þetta var helst:

22. nóvember
Öryggisvörður hélt innbrotsþjófi á HSS

Brotist var inn í Heilbrigðisstofnun Suðurnesja undir morgun, en öryggisvörður varð þjófsins var og hélt honum þar til lögregla kom á vettvang og handtók hann.

Talið er víst að hann hafi ætlað að stela þar lyfjum og verður hann yfirheyrður í dag.

22. nóvember:
Blóðugur baráttusigur hjá Keflavík gegn Njarðvík

„Þetta var enginn gæðakörfubolti frekar en yfirleitt þegar þessi nágrannalið mætast en sigurinn var okkar og það skiptir máli,“ sagði Hörður Axel Vilhjálmsson, leikmaður Keflavíkur eftir sigur í hörkuleik í Iceland Express deildinni í körfubolta í Toyota höllinni í kvöld. Lokatölur urðu 78-72.

Baráttan var mikil og Hörður þurfi að fara af leikvelli þar sem blóðið rann niður andlit hans eftir fjör í teig Njarðvíkur. Gert var að sárinu og Hössi fór síðan aftur inn á völlinn. „Þetta var alvöru nágrannaslagur og erfiður leikur eins og alltaf gegn Njarðvík. Þeir eru miklu betri en staða þeirra í deildinni segir til um,“ sagði Hörður.

„Við hefðum getað klárað þetta þegar við vorum komnir yfir en hlutirnir féllu ekki með okkur. Það er oft þannig þegar illa gengur,“ sagði Sigurður Ingimundarson, þjálfari Njarðvíkur.
Hvað segir þjálfarinn eftir fimmta tapið í röð?
„Við höldum áfram ótrauðir. Það er ekkert annað á dagskrá, förum í hvern leik með það hugarfar að vinna“.

Það var útlit fyrir öruggan Keflavíkursigur á upphafskafla leiksins. Heimamenn röðuðu niður körfum og leiddu 24-14 eftir fyrsta leikhluta þar sem Gunnar Einarsson tróð með tilþrifum rétt áður en flautað var til næsta leikhluta. Gunnar treður ekki oft en sýndi það þarna að hann fer létt mað það. Hann hélt áfram í upphafi annars leikhluta og byrjaði á þristi og kom Keflavík í 13 stiga forskot, 27-14 en þá vöknuðu Njarðvíkingar og þeir voru miklu betri það sem eftir lifði til hálfleiks. Keflvíkingar hengu þó á þriggja stiga forskoti 37-34.

Hæsti maðurinn á vellinum, Egill Jónasson kom Njarðvíkingum yfir í fyrsta sinn 39-41 með fallegri troðslu en Lazar Trifunovic kom Keflavík aftur yfir með svakalegri troðslu í hina körfuna. Það vantaði ekkert upp á einstaklingstilþrifin inn á milli þó svo mistökin væru mikil á báða bóga og gæði körfuboltans ekki mikil, hvorki í vörn né sókn, hjá báðum liðum. Eftir þriðja leikhluta var munurinn fjögur stig, heimamönnum í vil 59-55 en þeir grænu komust í fimm stiga forskot 62-67 þar sem Rúnar Erlings setti niður þrist, Chris Smith og Magnús Gunnarsson bættu við körfum og nú leist áhagendum Keflavíkur ekki á blikuna því lítið gekk hjá þeirra mönnum. Valentino skoraði næstu fimm stig og jafnaði aftur og síðan voru heimamenn sterkari á lokamínútunum og sigruðu með sex stiga mun 78-72.

Fimmta tap Njarðvíkur var staðreynd en Keflvíkingar hafa verið á góðu skriði eftir liðsstyrkinn sem þei fengu eftir fjóra leiki í deildinni. Þar hefur innkoma Serbans Lazars Trifunovic haft mikið að segja en hann skoraði 28 stig og tók 15 fráköst í þessum leik. Frábær leikmaður þar á ferð. Valentino Maxwell skoraði 16, Sigurður Þorsteins 12, Hörður Axel 11 og Gunnar Einarsson tíu stig, öll í fyrri hálfleik. Hjá Njarðvík skoraði Cristopher Smith 15 stig og Guðmundur Jónsson var með 14 og var bestur hjá Njarðvík. Friðrik Stefánsson var með 9 og Páll Kristinsson, Jóhann Ólafsson og Lárus Jónsson sex, aðrir minna.

Þriðja Suðurnesjaliðið, Grindavík tapaði með tveggja stiga mun í Hveragerði gegn Hamri, 78-76.



23. nóvember:
Reyndi að smygla 800 grömmum af amfetamíni

Lögreglan á Suðurnesjum rannsakar smygltilraun á 800 grömmum af amfetamíni til landsins. Karlmaður á fertugsaldri situr nú í gæsluvarðhaldi eftir að hann var tekinn með efnið í Leifsstöð fyrir nokkrum dögum. Hann er af erlendu bergi brotinn og var að koma frá Kaupmannahöfn.
Rannsóknardeild lögreglunnar  á Suðurnesjum tók við rannsókn málsins, sem stendur enn yfir.   Maðurinn var úrskurðaður í gæsluvarðahald til 1. desember 2010. Rannsókn málsins er á viðkvæmu stigi og verst lögreglan frekari frétta af málinu að svo stöddu.




23. nóvember :
Skipulag fyrir tölvuhýsingarmiðstöð tilbúið

Bæjaryfirvöld í Vogum hafa lokið vinnu við breytingar á deiliskipulagi á svæði undir 6000 fermetra tölvuhýsingarmiðstöð fyrirtækisins Midgard hf. Af hálfu sveitarfélagins er því ekkert að vanbúnaði að hefjast handa við framkvæmdir. Talsmenn fyrirtækisins segjast halda sínu striki þó tímaáætlanir hafi eitthvað raskast vegna efnahagsástandsins en verkefnið hefur verið í undirbúningi síðastliðin fjögur ár.

Sveitarfélagið Vogar og Midgard hf undirrituðu viljayfirlýsingu í maí á þessu ári vegna verkefnisins. Í skipulaginu, sem nú hefur verið klárað, voru byggingarreitir á þremur lóðum stækkaður á iðnaðarsvæði autan vegarins við innkomuna í bæinn en þar hyggst Midgard hf reisa 6000 fermetra þjónustubygginga í þremur áföngum. Fjárfesting vegna uppbyggingar gagnaversins í Vogum verður um 5 milljarðar króna gangi áætlanir eftir.



24. nóvember:
Sveitarfélögin taka við málefnum fatlaðra

Sveitarfélögin á Suðurnesjum taka yfir þjónustu við fatlaða nú um áramótin en heildarsamkomulag milli ríkis og sveitarfélaga þess efnis var undirritað í gær.
Sveitarfélög og þjónustusvæði á vegum þeirra taka þá við ábyrgð á framkvæmd og fjármögnun þjónustunnar, óháð því hvort hún hefur verið veitt af ríki, sveitarfélögum, sjálfseignarstofnunum eða öðrum aðilum, með þeim réttindum og skyldum sem henni tengjast.

Sveitarfélögin á Suðurnesjum hafa undanfarið undirbúið sig undir þetta stóra verkefni en um er að ræða eina viðamestu endurskipulagningu á verkaskiptingu ríkis og sveitarfélaga frá flutningi grunnskólans árið 1996.

Vegna yfirfærslunnar fá sveitarfélögin 1,20% hækkun á útsvarshlutfalli gegn samsvarandi lækkun á tekjuskattshlutfalli ríkisins. Auk þess er frágengið að veitt verða framlög vegna veikrar stöðu útsvarsstofnsins, notendastýrðrar persónulegrar aðstoðar, biðlista eftir þjónustu og breytingakostnaðar.

Talsverð umræða um yfirfærsluna hefur farið fram, m.a. á aðalfundi SSS í haust. Þar komu fram efasemdir um það hvort nægilega vel væri staðið að undirbúningi yfirfærslunar. Var m.a. lögð fram ályktun um að fresta henni um eitt ár en um það voru skiptar skoðanir.

24. nóvember:
Risatúr hjá Daðey GK

Smábátarnir á Suðurnesjum hafa verið að tínast til heimahafna eftir árvisst flakk til veiða fyrir autan og norðan. Einn þeirra er línubáturinn Daðey GK 777 en hann kom að landi með metafla í síðustu viku eða 12,5 tonn í einum róðri. Yfirleitt er aflinn á bilinu 3-5 tonn í róðri svo þessi túr gaf heldur betur. Uppistaðan í aflanum var keila eða 5,5 tonn og 4,1 tonn af þorski. Báturinn er með heimahöfn í Grindavík.

Að sögn Aflafrétta, sem greina frá þessu, má geta nærri að aflaverðmæti risatúrsins hafi verið um þrjár milljónir króna. Aflafréttir segja afla smábátanna hafa verið með ágætum undanfarið.



25. nóvember:
Fyrrum stofnfjáreigendur SpKef lýsa kröfum í þrotabú sjóðsins

Fyrrum stofnfjáreigendur Sparisjóðsins í Keflavík hafa ákveðið að lýsa kröfum í þrotabú sjóðsins. Þetta var ákveðið á fundi þeirra nýlega þar sem undirbúningsstjórn var kosin. Frestur til að lýsa kröfum í þrotabú SpKef rennur út 5. desember nk.

Undirbúningsstjórnin hefur samið samþykktir fyrir samtökin og kröfulýsingu með aðstoð lögmanns, segir í fréttatilkynningu frá félaginu í Víkurfréttum í dag. Í henni eru stofnfjáreigendur hvattir til þess að gera kröfu í þrotabú Sparisjóðsins.
„Það er það fyrsta sem stofnfjáreigendur ættu að gera, sem er þá undanfari þess að krafist verði rannsóknar á því hvers vegna Sparisjóðurinn fór á hausinn,“ segir þar ennfremur.

Félag stofnfjáreigenda í SpKef hefur opnað heimasíðuna spkefstofnfe.is þar sem hægt verður að nálgast kröfulýsinguna. Boðið verður upp á aðstoð við að fylla hana út.



25. nóvember:
Áfram verður greitt úr Manngildissjóði, segir Árni

Hannes Friðriksson fullyrðir í aðsendri grein á vf.is í dag að peningar úr Manngildissjóði Reykjanessbæjar, sem nýta átti til styrktarverkefna, hafi verið skuldfærðir á bæjarsjóð og varið í að greiða skuldir hans. Árni Sigfússon, bæjarstjóri segir þetta rangt.

„Það er rangt ef gefið er í skyn að manngildissjóður hafi verið rekinn undir sérstakri kennitölu eða aðgreindur frá bæjarsjóði.  Verkefni sem ætluð eru til mannræktar og aukins manngildis hafa verið sett undir manngildissjóð og úthlutað undir hans merkjum. Við höfum greitt til þessara verkefna um 30-50 milljónir kr. á ári hverju, eftir aðstæðum. Það er rangt ef haldið er fram að þau verkefni verði ekki studd á næsta ári, s.s. þjálfarastyrkir, stuðningur við íþróttafélög, forvarnir, menningarfélög og tómstundafélög.
Framlögin verða þó lægri eða nær 20 milljónum kr. á næsta ári, en fjárhagsáætlun verður væntanlega endanlega afgreidd um áramótin,“ segir Árni aðspurður hvað hæft sé í þeim fullyrðingum sem Hannes setur fram í grein sinni.

25. nóvember:
Ásbrú: Ríkið mjólkar – bærinn borgar

Ríkissjóður hefur haft 2,5 milljarða í tekjur af starfsemi Ásbrúar á meðan útgjöld Reykjanesbæjar vegna svæðisins eru 700 milljónir umfram tekjur. Bærinn samþykkti á sínum tíma að innheimta ekki opinber gjöld af ónotuðum fasteignum á gamla varnarsvæðinu. Bæjarráð Reykjanessbæjar telur forsendur brostnar fyrir þessari ákvörðun og segir ógjörning fyrir bæjarfélagið að gefa slíkan afslátt af opinberum gjöldum á meðan ríkið taki til sín verulegan hagnað af svæðinu.

Málið var til umfjöllunar á bæjarráðsfundi í morgun. Þar samþykkti bæjarráð að fella úr gildi yfirlýsingu Reykjanesbæjar frá 17. október 2007 um að ekki verði innheimt opinber gjöld af öllum fasteignum á Ásbrú. Ákvörðun bæjarráðs tekur gildi nú um áramótin.

Í bókun sem bæjarráð samþykkti í morgun segir eftirfarandi:

„Í samræmi við lög við brotthvarf varnarliðsins í lok árs 2006 og yfirtöku ríkis á eignum á svæðinu hugðist ríkið nýta tekjur af sölu eigna á svæðinu til uppbyggingar svæðis og þróunar atvinnumála. Í því skyni voru sett lög nr. 176/2006 sem gáfu Þróunarfélagi svæðisins rými til að greiða ekki opinber gjöld af eignum sem félagið hafði ekki ráðstafað með leigu eða sölu. Til að styrkja og hraða uppbyggingu svæðisins samþykkti Reykjanesbær 5. október 2007 að hið sama gilti um eignir sem aðrir keyptu af Þróunarfélaginu, þar til þær eignir færu í not. Styrkur, sambærilegur fasteignagjöldum, yrði veittur til eigna sem þróunarfélagið seldi ef þær voru ekki nýttar. Þannig fengist hreint söluverðmæti án opinberra gjalda sem nýtt yrði til uppbyggingar svæðisins.

Forsendur eru brostnar fyrir þessari ákvörðun. Í stað þess að leggja fjármunina af sölu eigna til þróunar svæðisins hefur ríkið nú tekið til sín um 2500 milljónir kr. Á sama tímabili eru útgjöld Reykjanesbæjar fyrir svæðið um 700 milljónir kr. umfram tekjur. Við erfiðar fjárhagslegar aðstæður er ógjörningur fyrir Reykjanesbæ að gefa slíkan afslátt af opinberum gjöldum og kosta miklu til þegar ríkið tekur til sín verulegan hagnað af svæðinu. Fyrri ákvörðun Reykjanesbæjar frá október 2007 er felld úr gildi og tekur breytingin gildi 1. janúar 2011.“



26. nóvember:
Silkitoppa gleður auga í Njarðvík

Þessi fallega silkitoppa gæddi sér á berjum í húsgarði við Gónhól í Njarðvík. Að sögn Gunnars Þórs Hallgrímssonar fuglafræðings hjá Náttúrustofu Reykjaness er silkitoppan flækingsfugl frá norðanverðri Evrópu sem virðist hafa komið til Íslands í stórum hópum nú í haust.
Gunnar segir að silkitoppu hafi orðið vart í öllum landshlutum og að hópur um 50 fugla sé á höfuðborgarsvæðinu. Þá hefur hennar m.a. orðið vart hér á Suðurnesjum, eins og meðfylgjandi ljósmynd staðfestir.

Ljósmynd: Ólafur G. Ingason