Fréttavikan á VF: Hákarl, Afsögn, slys, íþróttir

Það var frekar fjölbreytt fréttavikan á vf.is en þar kom við sögu óvanalegur gestur. Einnig fannst látinn maður í Sandgerðishöfn sem leitað hafði verið að. Þá voru slys í fréttunum og breytingar urðu á liðum í körfuboltanum.
Í fréttum á vf.is var þetta helst:

Hákarl valt af pallbíl í hringtorgi

Það var óvanalegur gestur sem stoppaði á hringtorginu á mótum Njarðarbrautar og Bólafóts í Njarðvík í morgun. Um fjögurra metra beinhákarl lá á götunni eftir að hafa runnið af pallbíl.
Ökumaður pallbílsins gætti ekki að sér og tók sennilega of krappa beygju á hringtorginu þannig að hákarlinn rann af pallinum. Hákarlinn var hífður með lyftara upp á pallbílinn og nú skyldi ekið varlegar svo hann kæmist til verkunar.

Fannst látinn í Sandgerðishöfn

Skotinn sem leitað var í gær af björgunarsveitum fannst skömmu fyrir hádegi í gær. Hann var látinn. Kafarar fundur lík hans í höfninni í Sandgerði. Lögreglan á Suðurnesjum fer með rannsókn málsins.
Maðurinn hafði verið búsettur í Sandgerði og starfað þar undanfarna mánuði við fiskvinnslu.

Fékk raflost í baðkari í Njarðvík

Rafverktakar hafa verið dæmdir til að greiða konu tæpar fimmtán milljónir króna, auk vaxta, vegna slyss sem hún varð fyrir á heimili sínu í Njarðvík árið 2002.

Þá var hún í baði og stóð í baðkarinu með talsvert vatn í karinu. Hún stóð með sturtutólið í hendinni og var að láta vatn renna á sig, þegar hún varð skyndilega fyrir miklum rafstraumi og hreinlega festist þannig standandi. Straumurinn fór um allan líkamann.

Konan hlaut um 50% varanlega örorku vegna slyssins að því er fram kemur í yfirmatsgerð dómskvaddra matsmanna. Hún kveðst hafa fengið exem á hendur vegna slyssins og sé með stöðugan kláða í lófunum. Af þeim sökum geti hún ekki stundað nein þau störf sem reyni á húðina á höndunum. Hún segist jafnan fá hjartsláttarköst, en þeim fylgi magnleysi og sviti og stundum yfirliðstilfinning. Hún segist sofa illa og þurfi ávallt að taka svefntöflur.

Fram kemur í dómnum að það sem olli slysinu var að jarðtaug sem tengist vatnslás baðkars var tengd inn á svokallaða núllskinnu í staðinn fyrir svokallaða jarðskinnu, eins og átti að gera.

Konan stefndi rafverktökunum , sem sáu um að leggja rafmagnið í íbúðina, byggingarverktakanum og Reykjanesbæ. Héraðsdómur sýknaði byggingarverktakann og Reykjanesbæ en stjórnendur rafverktakafyrirtækisins voru dæmdir bótaskyldir.

Það var Héraðdómur Reykjavíkur sem kvað upp dóminn en greint var frá honum á Vísi.

Jeppi valt á Grindavíkurvegi

Jeppi valt á Grindavíkurvegi um hálf áttaleytið í gærkvöldi. Ökumaður missti stjórn á bifreið sinni í hálku og endaði á toppnum. Ökumaðurinn og tveir farþegar voru fluttir á sjúkrahús með minniháttar meiðsl. Bíllinn er mikið skemmdur að sögn lögreglunnar á Suðurnesjum.

Kristján segir af sér

Kristján G. Gunnarsson hefur sagt af sér formennsku í Starfsgreinasambandinu og dregið sig út úr stjórnarstörfum fyrir Alþýðusamband Íslands og Festu lífeyrissjóð. Þá ætlar hann að ræða stöðu sína hjá Verkalýðs- og sjómannafélagi Keflavíkur og nágrennis við sína félaga í því félagi.

Kristján hefur sent frá sér yfirlýsingu þar sem segir að ábyrgð hans sem stjórnarmanns í Sparisjóðnum í Keflavík í aðdraganda falls sjóðsins hafi verið til umfjöllunar í fjölmiðlum. Segir Kristján að sjónarmið hans í því efni hafi ekki komist nægilega vel til skila og trúverðugleiki hans beðið hnekki.

„Ég bregst nú við með því að reyna að lágmarka þau áhrif sem þetta mál kann að hafa gagnvart þeim samtökum sem ég hef unnið fyrir lengst af á starfsævi minni. Ég hef þess vegna ákveðið að falla frá formennsku í Starfsgreinasambandi Íslands og draga mig út úr stjórnarstörfum fyrir ASÍ og Festu - lífeyrissjóð. Um stöðu mína í Verkalýðs- og sjómannafélagi Keflavíkur og nágrennis mun ég ræða við félaga mína í því félagi,“ segir í yfirlýsingu Kristjáns.

Liðstyrkur til Keflavíkur

Kvennalið Keflavíkur hefur fengið liðstyrk fyrir komandi átök í Iceland Express deild kvenna. Stúlkan sem um ræðir heitir Marina Caran og kemur frá Serbíu. Marina er fædd 1984 og er 180cm á hæð. Hún spilaði m.a. með liði Keltern í Þýskalandi, en það er sama lið og Jacqueline Adamshick spilaði fyrir. Þessi styrking á kvennaliði Keflavíkur er liður í því að ná settum markmiðum á tímabilinu. Þess ber að geta að það voru velunnarar kvennakörfunnar í Keflavík sem tóku sig saman og stóðu að fjármögnun leikmannsins.

Kevin Sims í raðir Grindavíkur

Grindvíkingar hafa loks gefið upp hver nýji leikimaðurinn er en hann heitir Kevin Sims. Kevin spilar stöðu leikstjórnanda eins og áður var greint á VF og var áður í Tulane háskólanum. Hann er fæddur árið 1988 og er 178 cm á hæð en þessu greinir umfg.is frá.

Miklar vonir eru bundnar við Kevin en liðið tapaði seinasta leik með 19 stigum á móti Haukum. Hann mun spila sinn fyrsta leik á fimmtudaginn en þá mætir Grindavík ÍR í Breiðholtinu.

Crystal Boyd sagt upp hjá Grindavík

Stjórn og þjálfari kvennaliðs Grindavíkur hafa ákveðið að segja upp samningi við Bandaríska leikmann liðsins Crystal Ann Boyd. „Hún var bara ekki að standa undir væntingum og var ekki að leggja sig fram,“ sagði Jóhann Þór Ólafsson, þjálfari liðsins.

Benóný Harðarsson, framkvæmdastjóri körfuknattleiksdeildar Grindavíkur sagði hana ekki vera peningana virði. „Hún hefur ekki verið að standa undir væntingum og hún var meira að skemma út frá sér heldur en að gera gott fyrir liðið. T.d. í síðasta leik spilaði hún um 16 mínútur og skoraði 7 stig því hún nennti hvorki að spila vörn né sókn, þannig þetta var það eina í stöðunni,“ sagði Benóný. „Við munum leita og hafa augun opin fyrir nýjum leikmanni en það bendir allt til þess að við munum spila kanalaus út tímabilið.“

Stór töp hjá Keflavík og Grindavík

Keflvíkingar og Grindvíkingar þurftu bæði að sætta sig við ósigur á útivöllum í Iceland Express deild karla í kvöld. Keflvíkingar öttu kappi við KR-inga í DHL Höllinni og framan af leit allt út fyrir jafnan leik og fyrri hálfleikur einkenndist af baráttu og hörku. Í þriðja leikhluta tóku KR-ingar til sinna ráða og kafsigldu Keflvíkinga gjörsamlega en lokatölur leikhlutans voru 29-7 KR í vil og útlitið svart fyrir Keflvíkinga. Keflvíkingar náðu að bíta frá sér í loka leikhlutanum en ósigur engu að síður staðreynd og lokatölur 99-85.

Atkvæðamestir hjá Keflavík:
Thomas Sanders 24 stig/6 fráköst, Hörður Axel Vilhjálmsson 18 stig/5 fráköst, Jón Nordal Hafsteinsson 10 stig, Magnús Þór Gunnarsson 8 stig/7 stoðsendingar.

Grindvíkingar þurftu sömuleiðis að játa sig sigraða á útivelli er þeir sóttu ÍR-inga heim fyrr í kvöld. Lokatölur urðu 92 - 69 ÍR í vil. Grindvíkingar voru undir nánast allan leikinn og áttu litla möguleika gegn sterkum ÍR-ingum.

Atkvæðamestir hjá Grindavík:
Kevin Sims 17, Þorleifur Ólafsson 14/4 fráköst, Ryan Pettinella 13/5 fráköst.

Samantekt: [email protected]