Frestur til að lyfta Guðrúnu Gísladóttur KE að renna út

Á morgun rennur út frestur sem eigendum Guðrúnar Gísladóttur KE var veittur til að lyfta skipinu af hafsbotni í Nappstraumen í Noregi þar sem það hefur legið í bráðum eitt ár. Í norska ríkisútvarpinu segir að hvað eftir annað hafi eigendurnir haft fresti, sem þeim hafa verið gefnir, að engu og þolinmæði heimamanna sé á þrotum. Í frétt norska ríkisútvarpsins í Norðurlandsfylki segir að björgunardeild norsku strandgæslunnar sé mjög óánægð með að ekki skuli vera búið að lyfta skipinu sem hvílir á 40 metra dýpi en í því eru m.a. 870 tonn af síldarafurðum, sem einu sinni voru frystar, og olía.Á vefsíðu Intra Fish kemur fram að norska umhverfisráðuneytið hafi veitt eigendunum frest til 1. maí til að lyfta skipinu en ljóst sé að ekki verði staðið við þau tímamörk, segir á fréttavefnum skip.is