Framtíð herstöðvarinnar í Keflavík rædd í fyrramálið

Elizabeth Jones, aðstoðarráðherra í málefnum Evrópu og Asíu í bandaríska utanríkisráðuneytinu, kemur til landsins seinnipartinn í tveggja daga heimsókn. Hún fundar með Halldóri Ásgrímssyni utanríkisráðherra um framtíð varnarsamstarfsins klukkan tíu í fyrramálið.Með Elizabeth Jones í för verður Ian Brzezinski, sem er vara-aðstoðarráðherra í bandaríska varnarmálaráðuneytinu og fjallar um málefni Evrópu og Atlantshafsbandalagsins. Hann er sonur Zbigniew Brzezinski, sem var þjóðaröryggisráðgjafi Bandaríkjanna í stjórnartíð Jimmy Carters og eru þeir feðgar taldir til haukanna svokölluðu í Washinton.

Haukarnir, undir forystu Donalds Rumfelds varnarmálaráðherra eru þeirrar skoðunar að endurskipuleggja þurfi herafla Bandaríkjanna erlendis meðal annars á Íslandi. Elizabeth Jones er hins vegar í liði Colins Powell utanríkisráðherra sem vill fara hægar í breytingar.

Ef eindregnustu hugmyndir um breytingar ganga eftir mun Bandaríkjaher draga mjög úr viðbúnaði sínum á Íslandi. Fyrsta skrefið yrði flytja þotusveit sem staðsett er í Keflavík til Bretlandseyja. Nú eru 1.900 bandarískir hermenn í herstöðinni í Keflavík. Þriðjungur þeirra er frá flughernum en innan við 100 eru í þotusveitinni sjálfri. Rúmlega 100 menn eru í þyrlusveitinni sem líklega færi um leið og þoturnar. Í ratsjársveit eru á þriðja hundrað menn. Þessar þrjár sveitir færu líklega ef hugmyndir haukanna um niðurskurð og brotthvarf flughersins gengju eftir.

Flotinn er með 1250 menn í Keflavíkurstöðinni og sér meðal annars um kafbátaeftirlit í hafinu umhverfis landið og ýmsa þjónustu á stöðinni. Líklegt er að talsvert yrði fækkað hjá flotanum ef flugherinn færi. Alls eru um 4.000 Bandaríkjamenn, hermenn og fjölskyldur þeirra, í Keflavík og um 1.700 Íslendingar vinna beint eða óbeint fyrir varnarliðið. Talsverður fjöldi þeirra myndi líklega missa vinnuna ef hugmyndir haukanna um minni viðbúnað ganga eftir.

Þegar hermönnum var fækkað um 40% upp úr 1990 fækkaði íslenskum starfsmönnum um fimmtung. Sérfræðingar sem fréttastofa ræddi við í dag eru sammála um að einhverjar breytingar séu líklegar á varnarsamstarfi Íslands og Bandaríkjanna, meðal annars vegna nýrrar hertækni og annars áhættumets. Þörf sé á að öryggismál íslendinga verði endurskoðuð í ljósi þessa. Ríkisútvarpið greindi frá.